Хитой ҳукумати Украинадаги уруш жарайонини синчиклаб ўрганиб, Россиянинг муваффақиятсизликлари ва ютуқларидан хулоса чиқармоқда. Булар Хитой армияси учун Тайван устидан урушда ёрдам бериши мумкин. Бу ҳақда The New York Times хабар берди.
“Дунёнинг нариги томонидаги икки қудратли давлат ўртасидаги билвосита курашни Пекин потенсиал урушга тайёргарлик кўришга ёрдам берадиган қурол, ҳарбий куч, разведка бўйича бебаҳо сабоқлар манбаи сифатида кўради”, — дейилади хабарда.
The New York Times журналистлари Украинадаги воқеаларни таҳлил қилинган 100 га яқин хитойлик тадқиқот ишлари ва оммавий ахборот воситаларини ўрганиб чиққан. Биринчи навбатда хитойлик ҳарбий таҳлилчиларни Тайван учун эҳтимолий жангда қандай инновациялар ва жанговар тактикалардан фойдаланиш қизиқтирган. Хитой Украинадаги орқа нишонларга зарба беришда Россиянинг гипертовушли қуроллардан фойдаланишини кузатган.
Пекин Украина қўшинларининг ўз ҳаракатларини мувофиқлаштириш ва Россиянинг Украина алоқаларини узиб қўйишга уринишларини четлаб ўтиш учун Starlink сунъий йўлдош алоқа тизимларидан фойдаланишини таҳлил қилган. Хитойлик таҳлилчиларнинг фикрича, Пекин Starlink’нинг ўзига хос аналогини яратиши ва душманнинг ўхшаш тизимини ишдан чиқариш йўлини топиши керак.
“Россия Ғарбни ўзининг ядровий қуроли билан урушга тўғридан-тўғри аралашишдан сақлай олгани хитойликларга ёққан. Улар ядровий қурол дастурини кенгайтиришлари керак, деб ҳисоблайди”, — дейилади хабарда.
Хитойлик таҳлилчилар Россия армиясининг асосий муаммосини қўшинларнинг моддий-техник таъминоти ва логистикада деб ҳисобламоқда.
Улар Хитой “келажакдаги денгиз йўллари, оролларни эгаллаб олиш” ҳақида гап кетганда ҳам худди шундай муаммоларга тайёрланиши кераклигини таъкидламоқда. The New York Times Россиянинг хатоларини ўрганиш Хитойнинг Тайван бўйича юзага келиши мумкин бўлган можарода ғалаба қозонишга қодир эканига ишончини кучайтириши мумкинлигини билдирди.
“Хитойнинг 225 миллиард долларлик расмий ҳарбий бюджети Россияникидан қарийб уч баравар кўп, Хитойнинг улкан ишлаб чиқариш ва технологик имкониятлари унинг кўплаб илғор дронлар ва рус армиясида етишмайдиган бошқа қуролларни ишлаб чиқариши мумкинлигини англатади”, — дейилади мақолада.
Россия-Украина урушидан хитойлар чиқарган яна бир хулоса — бу катта қуруқликдаги кучларни сақлаб қолиш, авиация ва денгиз флоти ривожланиши билан уларни камайтирмаслик зарурати.
“Буюк давлат оқилона қуруқликдаги кучларни сақлаши керак, акс ҳолда у жанг майдонида ўз устунлигини йўқотади”, — деб ёзган эди Сингхуа университетининг собиқ ҳарбий тадқиқотчиси У Daxуэй.
Изоҳ (0)