Россияда айрим ракеталар захираси 90 фоизга камайди. Мамлакат урушни давом этиш учун етарлича ракета ишлаб чиқара оладими?

Уруш бошланганидан бери Россия Украинани ўққа тутиш учун 4 750 га яқин турли рadiusли ракетадан фойдаланган. Бу ҳақда Forbes хабар берди.

Маълум қилинишича, Калибр ва Х-555/Х-101 тақчиллиги туфайли Кремль ўзининг қимматбаҳо Х-47 “Кинжал”, Х-22’лардан фойдаланишга ва зарбалар интенсивлигини сезиларли даражада камайтиришга мажбур.

“Россиянинг узоқ ва ўрта масофали ракеталарга эга бўлишдаги устунлиги у учун муҳим эди. Уруш бошида Украина қуролли кучлари собиқ совет ‘Точка-U’ тизимларининг масофаси (120 км) билан чекланганди. Ўз навбатида бу вақтда Россия Украинанинг бутун ҳудудини ўққа тута олган ва минглаб ракеталар билан қуролланганди”, — деб ёзади Forbes журналистлари.

Ракеталар қандай ҳисобланган?

Нашр Украина мудофаа вазири Алексий Резниковнинг ноябрь ва январдаги ҳисоботларидан маълумотларни тўплаган, шунингдек, Украина ҳарбий-ҳаво кучлари қўмондонлигининг ракета ҳужумлари ҳақидаги ҳисоботларини таҳлил қилган. Шу орқали Россияда қанча ракета қолгани ва Украинани ўққа тутиш учун фойдаланилган ракеталар нархи аниқланган.

Россияда қанча ракета қолди?

Forbes’га кўра, босқин бошланганидан бери Россия ҳарбий-космик кучлари ихтиёрида қолган деярли барча Калибр ва Х555/101 ракеталаридан фойдаланган. Бу, эҳтимол, Россиянинг қимматроқ Х-47 Кинжал ракеталаридан фойдаланишнинг асосий сабабидир.

Украина мудофаа вазирлиги 3 январда Россия ихтиёрида атиги 59 та “Калибр” ракетаси қолганини маълум қилди. Илгари Россия ойига 15 га яқин Калибр ракеталарини ишлаб чиқарган.

“Урушнинг 13 ойи давомида Россиянинг Х555/101 ракеталарининг захиралари 90 фоиздан ортиққа камайди. Россия муаммолари кўламини статистик маълумотлар тасдиқлайди: сўнгги ойларда ўққа тутилиш интенсивлиги кескин камайди, эҳтимол, электрон компонентларга нисбатан санкциялар туфайли янги ракеталарни ишлаб чиқаришдаги қийинчиликлар бор”, — деб ҳисоблайди журналистлар.

Шу билан бирга, Россияда ҳали ҳам 200 километргача бўлган нишонларни уриб, фронтдаги шаҳарларни йўқ қила оладиган минглаб С-300 қисқа масофали ракеталари мавжудлиги айтилди.

Россия қанча ракета ишлаб чиқариши мумкин?

Ҳозирда Россия ойига атиги 50 га яқин узоқ масофали ракета ишлаб чиқаришга қодир. Заҳира яратиш учун эса Россия ишлаб чиқарган ракеталаридан камроқ фойдаланиши керак.

Шу боис, Россия келаси қиш учун захира яратишда ёзда ракеталардан фойдаланишни чеклаши эҳтимолдан холи эмас. Ёки у Украинанинг энергетика инфратузилмасига зарба бериш ғоясидан бутунлай воз кечиши ва ракета тактикасини янги устуворликларга ўзгартириши мумкин.

Россия ракета зарбаларига қанча пул сарфлади?

Тўлиқ миқёсли босқин бошланганидан бери Россия Украинани ўққа тутиш учун 12,5 миллиард долларлик 2 475 та узоқ масофали ракета ва 3,5 миллиард долларлик 2 300 га яқин қисқа масофали ракеталардан фойдаланган.

Таққослаш учун, АҚШ 2003 йилда Ироқни бомбардимон қилиш учун тахминан 1 миллиард долларлик ракеталардан фойдаланган. АҚШ 1991 йилда "Чўл бўрони" операцияси пайтида Ироққа ракета ҳужуми учун деярли бир хил маблағ сарфлаган.

Сурия ва Ироқда ИШИД террорчилик гуруҳига қарши курашиш учун АҚШ ракета ва ҳаво ҳужумларига кунига тахминан 10 миллион доллар сарфлади. Бу Россиянинг ўртача харажатларидан тўрт баравар кам.

“Шундай қилиб, Украинани ўққа тутиш замонавий тарихдаги энг қиммат ракета кампанияларидан бирига айланди. Бироқ, АҚШ ва унинг иттифоқчиларининг операсияларидан фарқли ўлароқ, улар Россияга жанг майдонида сезиларли устунлик бермади ва Украина иқтисодиётини йўқ қилишда самарали бўлмади”, — дейди журналистлар.