Фаластинликлар Қуддусдаги Ал-Ақсо масжидида баррикада ўрнатди, Исроил полицияси эса кетма-кет иккинчи кеча бинога бостириб киришга уринди. Фаластин Қизил Ярим Ой жамияти маълумотларига кўра, сўнгги тўқнашувларда олти киши жароҳатланган, деб хабар бермоқда Associated Press агентлиги.
Қуддус вақфи ва Ал-Ақсо масжиди бўйича департаментнинг хабар беришича, полиция фаластинликларни тарқатиш учун яна электр токи гранаталари ва резина ўқлардан фойдаланган. Исроил ҳуқуқ-тартибот идоралари ўнлаб “вояга етмаган жиноятчилар” полицияга тош отаётгани, хавфсизлик кучлари эса тартибни тиклаш учун ҳаракат қилишга мажбур бўлаётганини иддао қилди.
5 апрель куни ҳам Фаластиннинг WAFA агентлиги Исроил полицияси Ал-Ақсо масжидига бостириб киргани ҳақида хабар берганди. Агентлик маълумотларига кўра, хавфсизлик кучлари масжиддаги фаластинликларга ҳужум қилиб, шовқин тарқатувчи гранаталар, кўзни ёшлатувчи газ, резина ўқ ва дубинкалардан фойдаланган. Фаластин Қизил Ярим Ой жамиятига кўра, Исроил хавфсизлик кучлари шифокорларнинг воқеа жойига келишига ва ярадорларга ёрдам кўрсатишига рухсат бермаган. Исроилнинг хатти-ҳаракатлари, хусусан, Иордания ва Миср томонидан қораланди.
Шунингдек, 5 апрель куни Исроил армияси матбуот котиби Авихай Эдрий Ғазо секторидан Исроилга 9 та ракета учирилганини маълум қилди. Унинг сўзларига кўра, улардан тўрттаси ҳаво ҳужумидан мудофаа тизимларини уриб туширган, қолган тўрттаси эса Ғазога туташ очиқ ҳудудларга қулаган. Шундан сўнг Исроил ҳарбий-ҳаво кучлари ҳам Ғазо секторидаги нишонларга авиазарба бергани хабар қилинди.
Изоҳ (0)