Таиландда Паттавикорм Бунрин исмли эркак ChatGPT тузиб берган рақамлар тўплами орқали лотереяда пул мукофотини қўлга киритди. Бу ҳақда маҳаллий Thaiger нашри хабар берди.
Маълум қилинишича, пул мукофоти тахминан икки минг батни (59 доллар) ташкил этади. Нейрон тармоқ эркакка тўртта вариантни таклиф қилган: 57, 27, 29 ва 99. Ўша куни икки хонали ютуқ рақами 99 ни ташкил қилган. ChatGPT лотерея учун дарҳол жавобларни тақдим этмаган. Бунрин лотереяда ютиш учун рақамлар ҳақида сўраганида ChatGPT “бу олдиндан айтиб бўлмайдиган ҳолат ва омадга боғлиқ” деб жавоб берган.
ChatGPT ҳазиллашиб, таиландлик эркакка “лотереяга ўйнашни тўхтатиб, спорт билан шуғулланишни” тавсия қилган. Шундан сўнг эркак сўнгги 10 йил ичида ютуққа олиб келган рақамларнинг тарихий статистикаси билан бирга фаразий вазиятлар бўйича ChatGPT’га сўров киритган.
Аввалроқ ChatGPT итнинг ҳаётини сақлаб қолгани маълум бўлганди. Жумладан, чатбот ветеринария шифокорлари аниқлай олмаган қон касаллигини аниқ ташхислаш орқали жониворнинг ҳаётини сақлаб қолган.
Маълумот ўрнида, Италия ChatGPT’дан фойдаланишни тақиқлаган дунёдаги биринчи давлат ҳисобланади. Чатбот ишлаб чиқарувчиси Американинг OpenAI компанияси шахсий маълумотларга оид қонунчиликни бузгани маълум қилинган. Жумладан, нейрон тармоқ +13 ёш чегарасига қарамай, фойдаланувчиларнинг ёшини текширмаслиги таъкидланади.
ChatGPT (Chat generative pre-trained transformer) — OpenAI томонидан яратилган сунъий интеллект чатботи бўлиб, турли саволларга жавоб бериши, дастурчилар учун код ёзишга ёрдам бериши, талабалар учун эса курс ишларини ёзиб бериши мумкин. Бот ҳаттоки шеър ва иншолар ҳам ёза олади. OpenAI’нинг асосий вазифаси инсон мияси бажара оладиган ҳамма нарсани қилувчи сунъий интеллектни яратишдан иборат.
Изоҳ (0)