Украина мудофаа кучлари бўлажак қарши ҳужум операциялари учун “Ҳужум гвардияси”нинг кўнгилли бўлинмаларига жалб қилиш орқали 40 минг ҳарбий хизматчини тайёрлади. Бу ҳақда Reuters хабар берди.
Украина Ички ишлар вазирлиги томонидан тузилган янги бригадалар Ғарб жанговар танклари ва хорижда ўқитилган минглаб янги жангчилар билан мустаҳкамланган армия бўлинмалари билан бирга жанг қилади. “Ҳужумчи гвардия” бўлинмасидан Алекснинг айтишича, у Украина бўлинмаларида бир йилдан кўпроқ вақт давомида жанг қилган. Янги тузилма урушни тезроқ тугатиши мумкинлигига умид қилмоқда.
“Мен уруш имкон қадар тезроқ тугашини хоҳлайман ва умид қиламанки, зарба бригадаси буни тезроқ амалга оширади”, — деган у.
Таъкидланишича, зарба бригадаларини шакллантиришга юқори мотивацияли кўнгиллиларни жалб қилиш бўйича агрессив реклама кампанияси олиб борилган. Кампания Украина янги қўшинларни ёллашда қийинчиликларга дуч келиши билан бир вақтда ўтказилмоқда.
Бироқ Украина ички ишлар вазири Игор Клименконинг сўзларига кўра, Киевда ҳали ҳам сезиларли мобилизация салоҳияти мавжуд – чақирилувчилар орасида аёллар, ҳарбий тажрибага эга бўлмаганлар, собиқ полициячилар ва ҳарбий хизматчилар бўлиши мумкин.
“Улар учун мақсад — Украинани озод қилиш. Биз давлатимизнинг келаси ўн йиллиги учун буюк тарихини ёзмоқдамиз”, — деган Клименко.
Журналистлар бригада кўнгиллиларининг ўз ихтиёри билан бўлинмага кирган сўзларини ҳам келтирди. Хусусан, 21 ёшли Баха ”Ҳужум гвардияси”га ўтишни сўраган. Яна бир жангчи Дмитрий валюта айирбошлаш шохобчасида ишлаган, у бригадага кўнгилли сифатида рўйхатдан ўтганини айтган.
“XXI асрда қанчалик шафқатсиз кўринмасин, мен қасос олмоқчиман. Бутун халқимиз, ўлдирилган болалар учун қасос олишимиз керак”, — деган Дмитрий.
Изоҳ (0)