Финляндия 4 апрель куни расман НАТОнинг 31-аъзоси бўлди, шу тариқа Россиянинг алянс билан қуруқликдаги чегараси икки баробарга ошди. Россия президенти матбуот котиби Дмитрий Песков НАТОнинг кенгайишига муносабат билдирди. Бу ҳақда “ТАСС” хабар берди.
Песковнинг сўзларига кўра, Россия ҳар сафар НАТО чегараларига яқинлашганда мамлакатда бутун хавфсизлик архитектурасини мувозанатлаш учун чоралар кўради.
“Ахир НАТО Россия чегаралари томон кенгаймоқда, Россия эмас. Балки Москва ўзининг ҳарбий инфратузилмаси билан НАТО чегараларига яқинлашади. Қарама-қарши йўналишда ҳаракат бор ва бу хавфсизлигимиз ҳақида ташвиш уйғотади. Бундан қайғурган ҳолда, табиийки, чоралар кўрамиз ва НАТО ҳар сафар чегараларимизга яқинлашганда мамлакат хавфсизлик архитектурасини мувозанатлашни танлаймиз”, — деди Песков.
Шунингдек, у Россия учун ҳозир Украинадаги урушни давом эттиришдан бошқа йўл йўқлигини айтди. Вазиятни тинч йўл билан тартибга солиш истиқболлари кўринмаётганини қўшимча қилди.
Аввалроқ Россия Ташқи ишлар вазирлиги Финляндиянинг НАТОга аъзолигини мамлакатлар ўртасидаги муносабатларни ёмонлаштиришини билдирганди.
“Биз бир неча бор огоҳлантирганимиздек, Россия Финляндиянинг НАТОга кириши муносабати билан миллий хавфсизлигимизга таҳдид соладиган хавфни тўхтатиш учун ҳарбий-техник ва бошқа характердаги жавоб чораларини кўришга мажбур бўлади”, — дейилган Россия ТИВ баёнотида.
Шунингдек, Россия Финляндия ўзининг шахсий сиёсий овозини йўқотганини, чунки у кўп йиллар давомида НАТОга аъзо бўлмаган кам сонли Европа давлатларидан бири бўлганини таъкидлаган. НАТО бош котиби Йенс Столтенберг эса Швеция ҳам Финляндия каби НАТОга аъзо бўлиш учун барча шартларни бажарганини ва унинг алянсга кириши йўлида ҳеч қандай тўсиқ бўлмаслиги кераклигини қайд этган.
Изоҳ (0)