Тошкент шаҳрида 2 апрель куни момақалдироқ билан кучли жала ёмғир ёғди, шамол тезлиги кучайди, баъзи жойларда дўл ёғиб ўтди.
Ёмғирнинг давомийлиги 2,5—3 соат бўлган. Шаҳар туманларида ёмғирнинг жадаллиги: Телеминора ҳудудида — 10 миллиметр, Тошкент—Обсерватория метеостанцияси ҳудудида — 22 миллиметр, Тошкент халқаро аэропорти ҳудудида — 33 миллиметрни ташкил этди. Дўлнинг диаметри 11 миллиметрга етди, шамол баъзи жойларда 18 метр/секундгача кучайган.
“Ўзгидромет” маълумотига кўра, таққослаш учун, 1936 йил 2 апрелда Тошкент—Обсерватория метеостанцияси ҳудудида 32 миллиметр ёмғир ёққан. Ўзбекистонда баҳор фаслида момақалдироқ билан кучли жала ёмғирлар ёғиши, баъзида дўл ёғиши ҳолатлари кўпинча содир бўлиб туради. Бундай ҳолатлар Тошкентда баҳор ойларида тез-тез кузатилади.
Тошкент шаҳрида 2022 йил март ойи энг нам, меъёр 66 миллиметр бўлганда бир ойда 189 миллиметр ёғингарчилик бўлган, у меъёрдан 285 фоизни ташкил этади. Бундай ёғингарчилик миқдори 1969 йил рекордини янгилади, ушбу даврда бир ой давомида 184 миллиметр ёғингарчилик бўлган.
Март ойида кеча-кундузлик максимал ёғингарчилик рекорди 50 миллиметрни ташкил этади, у 2009 йил 18 мартда ўрнатилган. 2011 йил 14 март куни Тошкентда бир кеча-кундузда 37 миллиметр ёмғир ва қор кўринишидаги ёғингарчилик ёғди. Тошкентда деярли ҳар йили 15 миллиметрдан 22 миллиметргача бўлган кучли ёғингарчилик бўлади, миқдори 23 мм дан 30 миллиметргача бўлган жадал ёғингарчиликлар эса 3—5 йилда 1 марта кузатилади.
Кузатув тарихида 1990 йилнинг апрель ойи энг нам бўлган. Тошкентда 179 миллиметр ёғингарчилик ёғди, бу тахминан 3 ойлик меъёрни ташкил этди, 1990 йил 8 апрелда кеча-кундузлик ёғингарчилик миқдорининг мутлақ рекорди ўрнатилди. Апрель ойининг ойлик меъёри 63 миллиметр бўлганда шу кун давомида Тошкентда 65 миллиметр ёмғир ёғган.
2019 йил апрель ойида Тошкентда ой давомида 146 миллиметр ёмғир ёғди, бу меъёрдан 236 фоизни ташкил этди, 24 апрель куни эса кеча-кундузлик максимум 41 миллиметрни, бу ойлик меъёрдан 65 фоизни ташкил этди. 19—21 апрель кунлари кетма-кет уч кун давомида жами миқдори 52 миллиметр (ойлик нормадан 83 фоиз) бўлган кучли ёмғир кузатилди.
Изоҳ (0)