“Лотоклар бундай катта оқимни қабул қилишга мўлжалланмаган”. Тошкент ҳокимлиги кўчаларни сув босганига изоҳ берди

Тошкентда 2 апрель куни тушдан кейин кузатилган ёғингарчилик сабаб кўплаб кўча ва метро бекатларини сув босгани акс этган видеолар тарқалди. Пойтахт ҳокимлиги ёмғир сувлари нима сабабдан кўчаларга тошиб кетганига изоҳ берди.

Қайд этилишича, Тошкент шаҳридаги лотокларнинг ўртача диаметри 300 миллиметрга тенг. Улар ёғингарчилик сувларини коллекторлар ва каналларга етказади. 2 апрель куни икки соат давомида кузатилган кучли ёғингарчилик натижасида 20 миллиметр ёмғир ёғган ва бу апрель ойи учун белгиланган умумий меъёрнинг, яъни 60 миллиметрнинг учдан бир қисмига тенг.

“Лотоклар бир пайтнинг ўзида бундай катта оқимни қабул қилишга мўлжалланмагани боис шаҳримиздаги бир неча манзилгоҳларда сув тўпланиши кузатилди”, — дейилади ҳокимлик муносабатида.

Таъкидланишича, ушбу ҳолатни тезкорлик билан бартараф этиш мақсадида Тошкент шаҳар Ободонлаштириш бош бошқармаси ва унинг туман бошқармалари, коммунал соҳа тизимлари, Фавқулодда вазиятлар бошқармаси ҳамда Ички ишлар бош бошқармасининг 500 дан ортиқ ходимлари ва юздан ортиқ махсус техникалари жалб этилиб, соат 23:00 гача барча манзиллардаги ҳолатлар бартараф этилган.

Таъкидлаш керакки, пойтахт кўчаларининг кучли ёғингарчилик вақтида сув остида қолиши доимий кузатиладиган ҳолат. Масалан, 2022 йил майда кучли ёмғир сабаб Тошкент шаҳри кўчаларини сув босганди. Бу каби ҳолат 2020 ва 2019 йилларда ҳам кузатилган.