Черногориядаги президентлик сайловларида берилган овозларни санаб чиқиш натижаларига кўра, европапараст иқтисодчи, “Europe Nоw” ҳаракатидан номзод Яков Милатович ғалаба қозонди — уни сайловчиларнинг 60 фоизи қўллаб-қувватлаган. Бу ҳақда 3 апрель, душанбага ўтар кечаси сайлов жараёнини кузатувчи Мониторинг маркази маълум қилди.
Сайловда мағлуб бўлган давлат раҳбари Мило Жуканович 1991 йилдан бери мамлакат бош вазири лавозимида беш марта ишлаган, икки марта — 1998 йилдан 2002 йилгача ва 2018 йилдан ҳозиргача президент бўлган. Иккинчи раунд якунида у мағлубиятини тан олди ва рақибини табриклади. Жуканович 21 майга қадар президентлик фаолиятини давом эттиради.
Янги президент мамлакатни Европа Иттифоқига олиб киришга ваъда берди
“Черногория ўз танловини қилди. Мен бу танловни ҳурмат қиламан ва унга муваффақиятли президент бўлишини тилайман. Шунда Черногория ҳам муваффақиятли бўлади”, — деди Жуканович.
Милатович 2020 йилнинг декабридан 2022 йилнинг апрелигача иқтисодиёт ва иқтисодий ривожланиш вазири лавозимида ишлаган. Ўтган йили у “Europe Nоw” партиясига асос солган. Ғалабадан сўнг ўз тарафдорлари олдида сўзга чиққан Милатович Черногория келаси беш йил ичида Европа Иттифоқига қўшилишини ваъда қилди. Мамлакат 2008 йилда Европа Иттифоқига номзод мақомини олганди.
“Черногория олдинга қатъий қадам ташлади ва эскирган Мило Жуканович режими билан хайрлашди. Мамлакат Европа, янада гўзал ва адолатли Черногория томон бир қадам ташлади”, — деди Милатович.
Шу билан бирга, сербияпараст лагер томонидан қўллаб-қувватланган Яков Милатович Белград билан ҳам алоқаларни мустаҳкамлашга ҳам ваъда беради.
Изоҳ (0)