Япония ва Хитой ташқи ишлар вазирлари 2 апрель, якшанба куни икки давлат ўртасидаги кескинлик фонида уч йилдан ортиқ вақтдан бери биринчи марта музокара ўтказди, деб хабар бермоқда DW.
Япония ташқи ишлар вазири Ёсимаса Хаясининг ташрифи япон дипломатининг Хитойга сўнгги уч йилдаги биринчи ташрифи бўлди, дея қайд этади AP. Ҳамкасби Син Ган билан учрашувда у япон фуқаросининг Пекинда ҳибсга олинишига норозилик билдирди, шунингдек, Токио Тайван яқинида ва Япония атрофида Хитойнинг ҳарбий фаоллиги кучайиб бораётганидан “кучли хавотирда” эканини билдирди.
Япония фармацевтика компанияси Астеллас Pharma ходими бир ҳафта аввал Пекинда жосусликда айбланиб, ҳибсга олинган эди. Иккала томон ҳам унга қўйилган айблар ҳақида батафсил маълумот бергани йўқ, деб ёзади AP. Япония ТИВ маълумотларига кўра, ҳозирда Хитойда беш нафар япон фуқароси ҳибсда, улардан икки нафари аллақачон судланган ва айбдор деб топилган. Син Ган бунга жавобан Хитой “ишни қонунга мувофиқ олиб бораётганини” айтди.
Тайван атрофида кескинликнинг кучайиши
Хаяси, шунингдек, Хитойнинг ҳарбий фаоллиги, жумладан, Россия билан ҳамкорлиги ва Шарқий Хитой денгизидаги ҳарбий ҳаракатларидан “жиддий хавотир” билдирди. “Биз иккаламиз ҳам турли масалалар, жумладан, миллий хавфсизлик масалалари бўйича мулоқотни давом эттириш муҳимлигини яна бир бор тасдиқладик”, — деди Япония вазири.
Унинг сўзларига кўра, томонлар “конструктив ва барқарор муносабатлар”га эришиш учун ҳамкорлик қилишга келишиб олган. Син Ган, ўз навбатида, Японияни Тайван билан боғлиқ масалаларга аралашмаслик ҳақида огоҳлантирди ва Токио “ҳеч қандай тарзда Хитой суверенитетига путур етказмаслиги” кераклигини айтди, дейилади Хитой Ташқи ишлар вазирлиги баёнотида.
Ёсимаса Хаяси таъкидлашича, келишмовчиликларга қарамай, икки давлат Жанубий Корея билан уч томонлама музокараларни давом эттиришга келишиб, буни “муҳим ютуқ” деб атаган.
Изоҳ (0)