Финляндияда парламент сайлови натижаларига кўра, амалдаги бош вазир Санна Марин бошчилигидаги Социал-демократик партия консерваторларга кичик фарқ билан ютқазди. Энди ҳукуматга мухолифатдаги Миллий коалиция раҳбари Петтери Орпо раҳбарлик қилиши мумкин.
Сайлов натижаларига кўра, Орпо 20,8 фоиз, ўта ўнгчи “Финлар” партияси эса 20,1 фоиз овоз олган. Шу билан бирга, Марин партиясига сайловчиларнинг 19,9 фоизи овоз берган.
Орпо сайловчилардан янги ҳукумат тузиш учун мандат олганини маълум қилди. Кўп ўтмай, Марин мағлубиятини тан олди.
Сайловнинг якуний натижалари 5 апрель, чоршанба куни маълум бўлади.
Сайловга бир неча ҳафта қолганида ҳам Финляндиянинг учта асосий партияси деярли бир хил рейтингга эга эди ва овоз бериш натижаларини олдиндан айтиб бўлмасди.
Уч партиянинг ҳеч бири мустақил ҳукумат туза олмайди, ғолиб коалиция бўйича шериклар излашга мажбур бўлади. Ғолиб партия биринчи бўлиб бундай коалиция тузишга ҳаракат қилиши мумкин.
Сайлов натижалари Финляндиянинг НАТОга киришига таъсир қилиши даргумон: жарайон деярли якунланган ва уни мамлакатнинг барча асосий сиёсий кучлари қўллаб-қувватлаган. Сайлов кампаниясининг асосий мавзуси мамлакатнинг давлат қарзи бўлди.
Тўрт йил олдин Санна Марин дунёдаги энг ёш бош вазирга айланган эди. Ижтимоий сўровларда унинг шахсий рейтинги ҳали ҳам юқори.
Орпо Финляндиянинг 200 ўринли парламентида кўпчилик тарафдорларга эга бўлиш учун барча партиялар билан музокаралар олиб боришга тайёр эканини айтган бўлса, Марин Орпо билан бир коалицияга кириши мумкинлигини, лекин “Финлар” билан эмаслигини таъкидлади. Ҳукуматни шакллантириш учун коалиция 100 дан ортиқ ўринга эга бўлиши керак.
Изоҳ (0)