Украина Миллий хавфсизлик ва мудофаа кенгаши (МХМК) котиби Алексий Данилов “Қримни деоккупация қилиш бўйича 12 қадам” дастурини тақдим этди. Россия томонидан аннексия қилинган яриморол Украинага қайтарилганидан кейин амалга ошириладиган ҳуқуқий ва ташкилий чора-тадбирлар режаси бўлган ҳужжат 2 апрель, якшанба куни Даниловнинг Facebook’даги саҳифасида эълон қилинди.
МХМК котибининг сўзларига кўра, “кенг доирадаги мутахассислар ва экспертлар иштирокида” ишлаб чиқилган дастур қуйидагиларни ўз ичига олади: 2014 йилдан бери Россия томонидан сиёсий сабабларга кўра таъқибга учраган Украинанинг барча фуқаролари, қрим татарларини дарҳол озод қилиб, уларга етказилган маънавий зарарни қоплаш, 2014 йил февраль ойидан кейин Украина қонунларига мувофиқ бўлмаган барча битимларни ноқонуний деб тан олиш, мулкларни аввалги эгаларига қайтариш, 2014 йил февралидан кейин Қрим яриморолида ноқонуний яшаш учун келган барча Россия фуқароларини депортация қилиш, шунингдек, Украинанинг собиқ фуқароларини коллоборация ва хиёнат учун жиноий жавобгарликка тортиш ва ҳоказолар.
“Қрим кўприги бузилиши керак”
Бундан ташқари, “тўлиқ ҳаракат эркинлигини таъминлаш учун” Қрим кўпригини бузиб ташлаш, Қримдаги “рус мафкурасида, афсоналар яратишда ва тарихни қайта ёзишда асосий рол ўйнайдиган” Севастопол шаҳрининг номини ўзгартириш кабилар таклиф қилинмоқда
“Қрим — бу Украина! Бизнинг фуқароларимиз, Қримда яшаётган Украина фуқаролари уйга қайтишни кутмоқда! Биз уларни ҳеч қачон унутганимиз йўқ, Перекоп бўйнига (Қримни Украина билан боғлайди) умид ва ишонч билан қараб турган миллионлаб кўзларни ҳеч қачон унутиб қўймаймиз”, — дея хулоса қилинади ҳужжатда.
Ҳарбий-дипломатик йўл
Эслатиб ўтамиз, аввалроқ Украина Мудофаа вазирлиги разведка бошқармаси бошлиғи Кирилл Буданов Украина Қуролли кучлари Россия томонидан босиб олинган барча ҳудудларни озод қилишини, босиб олинган Қрим эса ҳарбий куч ва дипломатия бирлашган йўл билан қайтарилишини маълум қилганди. Унинг таъкидлашича, асосий вазифа Украинани 1991 йилги дунёда тан олинган чегараларга қайтаришдир.
Ўз навбатида, АҚШ штаб бошлиқлари қўмитаси раиси Марк Милли Украина Қуролли кучлари 2023 йил давомида Россия армиясини ҳайдаб, Донбасс ва Қрим устидан назоратни тиклай олишига шубҳа билдирди. Бу “жуда ва жуда қийин, аммо имконсиз бўлмаган ҳарбий вазифа”, деди генерал Defence One нашрига берган интервьюсида.
Изоҳ (0)