“Ўзгидромет” дам олиш кунлари учун об-ҳаво маълумотини эълон қилди.
Унга кўра, 1 апрель, шанба куни Ўзбекистон ҳудудининг катта қисмида ёғингарчилик кутилмайди, фақат Самарқанд, Жиззах, Қашқадарё, Сурхондарё вилоятларида бугун кундуз куни баъзи жойларда қисқа муддатли момақалдироқли ёмғир ёғади. Кундузги ҳаво ҳарорати 20-25 атрофида бўлади.
Якшанба куни Каспий денгизининг жанубий ҳудудларидан циклон кириб келиши, бунинг ҳисобига нам ҳаво массалари кириб келиши кутилмоқда. Ўзбекистон ҳудуди бўйича баъзи жойларда қисқа муддатли момақалдироқли ёмғир ёғади. Навоий, Самарқанд, Қашқадарё вилоятларида, тоғолди ва тоғли ҳудудларда баъзи жойларда кучли бўлади. Республиканинг айрим ҳудудларида дўл ёғиши мумкин. Фақат шарқий ҳудудларда ёғингарчиликсиз об-ҳаво сақланиб туради.
1—2 апрелда республика бўйича баъзи жойларда шамол тезлиги 15-20 метр/секундгача кучайиши, республика шимолида ва чўл ҳудудларида 22-25 метр/секундгача кучайиши, айрим жойларда чанг-тўзон билан кузатилиши мумкин.
2 апрелда тоғолди ва тоғли ҳудудларда сел-сув тошқин ҳодисалари юзага келиши мумкин.
Тошкентда асосан ёғингарчиликсиз об-ҳаво бўлиши кутилмоқда. Шамол 3-8 метр/секунд тезликда эсади. Ҳаво ҳарорати 24-27 даража бўлади.
Изоҳ (0)