“Хитой—Қирғизистон—Ўзбекистон темирйўлини қуриш лойиҳасининг ҳужжат ишлари якунланмоқда” — Ойбек Ҳамроев
Хитой—Қирғизистон—Ўзбекистон темирйўлини қуриш лойиҳасининг ҳужжат ишлари якунланмоқда. Бу ҳақда 31 март куни АОКАда бўлиб ўтган матобуот анжуманида Инвестициялар, саноат ва савдо вазири ўринбосари Ойбек Ҳамраев маълум қилди.
Ойбек Ҳамраевнинг айтишича, ҳозирда лойиҳа офиси Қирғизистонда иш бошлаган.
“Бу биз учун логистика соҳасидаги муҳим, стратегик лойиҳа ҳисобланади. Бунга яна қўшимча равишда Термиз—Мозори шариф—Пешовар темирйўлини қуриш лойиҳаси ҳам бор. Бу иккита темирйўл қурилиши бўйича ишлар параллел олиб борилмоқда. Ҳозир лойиҳа офиси Қирғизистонда ўз ишини бошлади. Лойиҳанинг ҳужжат ишлари якунланмоқда. Қирғизистон, Ўзбекистон ва Хитой ҳукуматлари лойиҳани молиялаштиришда халқаро молия институтларини жалб қилиш бўйича биргаликда ишламоқда”, — деди вазирлик расмийси.
Хитой, Қирғизистон ва Ўзбекистонни боғлайдиган темирйўл қурилиши 25 йил давомида режалаштирилган. 1997 йилдаёқ лойиҳа бўйича ўзаро англашув меморандуми имзоланган.
Аввалроқ Қирғизистон президенти Садир Жапаров Хитой—Қирғизистон—Ўзбекистон (CKU) темирйўли қурилиши жарайони 2023 йилдан бошланишини маълум қилганди.
“Жорий йилда (2022 йил) техник-иқтисодий асосларни тайёрлаб, қурилишни 2023 йилда иш бошлаймиз. Учала давлат ҳам жарайонга тайёрланмоқда. Лойиҳа натижасида иш ўринлари яратилади, иқтисодиётимиз ўсади”, — деганди Жапаров.
Президент Шавкат Мирзиёев 2022 йилда ўтказилган Тошкент халқаро инвестиция форумининг очилиш маросимидаги нутқида ҳам ушбу темирйўл қурилишига тўхталиб ўтган.
“Ўзбекистонда ишлаб чиқарилаётган маҳсулотларни Ўзбекистон—Қирғизистон—Хитой темирйўли орқали Осиё—Тинч океани минтақасига етказиш учун имкониятлар яратиш бўйича амалий ҳаракатлар олиб борилмоқда”, — деган давлат раҳбари.
Ўзбекистон расмийлари аввалроқ темирйўл қуриб битказилгандан сўнг, бу Хитойдан Европа ва Яқин Шарққа юк ташиш учун энг қисқа йўл бўлиб, юк ташиш йўлини 900 километрга қисқартиришини ва 7-8 кунлик юк ташиш вақтини тежашини айтганди.
Хитой—Европа юк темирйўлининг жанубий қисмига айланадиган CKU йўналиши Хитой, Қирғизистон ва Ўзбекистонни Эрон ва Туркия орқали Марказий ва Шарқий Европага боғлайди. Режага кўра, темирйўлнинг умумий узунлиги қарийб 523 километрни ташкил этади. Жумладан, Хитойда 213 километр, Қирғизистонда 260 километр ва Ўзбекистонда 50 километрга яқин қисми қурилади.
