Хоразм вилоятига ижтимоий муаммоларни ҳал қилиш учун 2023 йилда қўшимча 400 млрд сўм ажратилади
Айни вақтда президент Шавкат Мирзиёев халқ депутатлари Хоразм вилояти Кенгаши сессиясида иштирок этмоқда. Бу ҳақда “Дарё” мухбири хабар берди.
Хоразм вилояти ҳокими вазифасини бажарувчи Жўрабек Раҳимов мактаб ва боғчалар барпо этиш, аҳолини уй-жой, ичимлик суви билан таъминлаш, йўлларни таъмирлаш, умуман маҳаллада яшаш шароитларини яхшилаш бўйича режаларини маълум қилди.
Президент ҳокимнинг мактабларда санитария ҳолатини яхшилаш, “2 та тил ва 1 та касбга ўргатиш” хоналарини ташкил қилиш ҳамда 12 та туманда “IT парк” очиш ташаббуси маъқул бўлганини айтди ва бунга қўшимча 60 миллиард сўм ажратиш бўйиича топшириқ берди.
Шунингдек, 1 августга қадар 25 та оғир мактабни парта билан таъминлашга 30 миллиард сўм ажратилади. 100 та мактабдаги компьютер синфлари учун 20 миллиард сўм йўналтирилади. Бундан ташқари, 9 та тиббиёт муассасаси замонавий ускуналар билан жиҳозлаш масаласи ҳал қилинади. Вилоят ҳамда Янгибозор ва Боғот перинатал марказларига учта реанимобил етказиб берилади.
Вилоятда йил якунигача авария ҳолатидаги 14 та кўприк таъмирланади. Умуман вилоятдаги маҳаллий йўлларни тўлиқ таъмирлашга 90 миллион доллар йўналтирилади. 2023 йилда Питнак, Урганч ва Хива шаҳарларида ичимлик ва оқова сувини яхшилаш лойиҳасини бошлашга 41 миллион доллар йўналтирилади.
Йил якунигача Тупроққалъа, Ҳазорасп, Боғот, Хонқа ва Янгиариқни узлуксиз ичимлик суви билан таъминлаш учун “Капарасс” насос станциясидаги ишлар якунланади ва бунга 60 миллиард сўм ажратилади. Шароити оғир 6 792 та оила уй-жойини яхшилаш ҳамда ички йўллар, электр ва ичимлик суви тармоғини таъмирлашга 280 миллиард сўм йўналтирилади.
Шунингдек:
- янги қурилаётган “Ал-Хоразмий” уй-жой массивининг инфратузилмасига 100 миллиард сўм;
- Янгиариқ ва Янгибозордаги ичимлик суви оғир 5 та маҳаллага, шунингдек 14 та мактабга олиб борадиган пиёда йўлларини таъмирлашга 20 миллиард сўм;
- Гурлан, Янгибозор, Урганч, Хонқа, Боғот ва Ҳазорасп туманларидаги 49 та қишлоқда мактаб, боғча, йўл ва ичимлик суви муаммоларини ҳал қилишга 85 миллион доллар йўналтирилади.
“Умуман олганда, Хоразмда ижтимоий муаммоларни ҳал қилишга 2023 йилда қўшимча 400 миллиард сўм, оилавий тадбиркорликни ривожлантиришга яна 150 миллиард сўм ажратилаяпти. Бундан ташқари, аграр соҳа, ичимлик суви ва тадбиркорлик лойиҳаларига қўшимча 475 миллион доллар жалб қилиш бўйича топшириқ бердим. Вилоят ҳокими бунга қўшимча 200 миллиард сўм топиб, вилоятда барча масалаларни тўлиқ ҳал қилиш мажбуриятини олади”, — дея қўшимча қилди Шавкат Мирзиёев.
