Россия—Украина урушининг Ўзбекистонга иқтисодий таъсирини пасайтириш бўйича қандай чоралар кўрилаётгани айтилди
Россия—Украина урушининг Ўзбекистонга иқтисодий таъсирини юмшатиш бўйича бир неча инструментлардан фойдаланилмоқда. Бу ҳақда АОКАда бўлиб ўтган матбуот анжуманида Иқтисодиёт ва молия вазири ўринбосари Дилшод Султонов айтиб ўтди.
Дилшод Султоновнинг таъкидлашича, урушнинг иқтисодий таъсирини камайтириш учун бож ва экспорт субсидиялари кенг қўлланмоқда.
“Бизга ҳамкор давлатлар орасида бўлаётган уруш Ўзбекистонга ҳам таъсирини кўрсатади. Шунинг учун бир қатор чораларни кўришни бошлаганмиз ва экспортимизни ўстиришга ҳаракат қиляпмиз. Экспорт ҳажмини бу йил 19 миллиард долларга олиб чиқмоқчимиз. Импортни эса 29-32 миллиард долларлик диапазонда сақлаб қолмоқчимиз. Бунда бир неча инструментлардан, хусусан, бож ва экспорт субсидияларидан кўп фойдаланяпмиз. Аввал маҳсулотларимизни Россияга кўп экспорт қилган бўлсак, ҳозир Европа мамлакатларига экспорт қилиш ҳаракатидамиз”, — дейди вазирлик расмийси.
Мулоқотда Дилшод Султонов жаҳонда кузатилаётган глобал инфляция шароитида республикада инфляция кўрсаткичи йиллик 12,3 фоизни ташкил этганини айтди.
“Бунда ноозиқ-овқат маҳсулотлари 10,7 фоизга, хизматлар 8,3 фоизга, озиқ-овқат маҳсулотлари қарийб 15,5 фоизга ошди. 2023 йил январь ойида ҳаво ҳароратининг кескин совиб кетиши иқтисодиёт тармоқлари ва аҳолига энергия ресурсларини етказиб беришда узилишлар келтириб чиқарди. Бунинг натижасида иқтисодиётнинг асосий тармоқлари ҳисобланадиган саноат, қурилиш, қишлоқ хўжалигида пасайиш кузатилди”, – деди вазир ўринбосари.
Аввалроқ Дилшод Султонов Ўзбекистоннинг 2022 йилдаги бюджет кўрсаткичлари тўғрисида ҳисобот берганди.
“Ўтган йили давлат бюджети даромадлари 202 триллион сўмни, харажатлари 236,5 триллион сўмни ташкил қилди. Ялпи ички маҳсулотга нисбатан бюджет дефицити 3,9 фоиз ёки 35 триллион сўм бўлди. Бюджет тақчиллигининг 24,4 триллион сўми ички ва ташқи қарз ҳисобига, 4,7 триллион сўми бюджетдан ташқари маблағлардан, 4,5 триллион сўми давлат активларини хусусийлаштиришдан тушган маблағлардан қопланган”, – деган у.
Мавзуга доир:
- Россия—Украина уруши Ўзбекистон иқтисодиётига қандай таъсир қилди?
- Украинадаги уруш Ўзбекистон иқтисодиётига қандай таъсир қиляпти? Мутахассис изоҳи
- Ўзбекистон ва дунёда озиқ-овқат инфляцияси қандай кечмоқда?
