Rossiya—Ukraina urushining O‘zbekistonga iqtisodiy taʼsirini yumshatish bo‘yicha bir necha instrumentlardan foydalanilmoqda. Bu haqda AOKAda bo‘lib o‘tgan matbuot anjumanida Iqtisodiyot va moliya vaziri o‘rinbosari Dilshod Sultonov aytib o‘tdi.
Dilshod Sultonovning taʼkidlashicha, urushning iqtisodiy taʼsirini kamaytirish uchun boj va eksport subsidiyalari keng qo‘llanmoqda.
“Bizga hamkor davlatlar orasida bo‘layotgan urush O‘zbekistonga ham taʼsirini ko‘rsatadi. Shuning uchun bir qator choralarni ko‘rishni boshlaganmiz va eksportimizni o‘stirishga harakat qilyapmiz. Eksport hajmini bu yil 19 milliard dollarga olib chiqmoqchimiz. Importni esa 29-32 milliard dollarlik diapazonda saqlab qolmoqchimiz. Bunda bir necha instrumentlardan, xususan, boj va eksport subsidiyalaridan ko‘p foydalanyapmiz. Avval mahsulotlarimizni Rossiyaga ko‘p eksport qilgan bo‘lsak, hozir Yevropa mamlakatlariga eksport qilish harakatidamiz”, — deydi vazirlik rasmiysi.
Muloqotda Dilshod Sultonov jahonda kuzatilayotgan global inflyatsiya sharoitida respublikada inflyatsiya ko‘rsatkichi yillik 12,3 foizni tashkil etganini aytdi.
“Bunda nooziq-ovqat mahsulotlari 10,7 foizga, xizmatlar 8,3 foizga, oziq-ovqat mahsulotlari qariyb 15,5 foizga oshdi. 2023-yil yanvar oyida havo haroratining keskin sovib ketishi iqtisodiyot tarmoqlari va aholiga energiya resurslarini yetkazib berishda uzilishlar keltirib chiqardi. Buning natijasida iqtisodiyotning asosiy tarmoqlari hisoblanadigan sanoat, qurilish, qishloq xo‘jaligida pasayish kuzatildi”, – dedi vazir o‘rinbosari.
Avvalroq Dilshod Sultonov O‘zbekistonning 2022-yildagi budjet ko‘rsatkichlari to‘g‘risida hisobot bergandi.
“O‘tgan yili davlat budjeti daromadlari 202 trillion so‘mni, xarajatlari 236,5 trillion so‘mni tashkil qildi. Yalpi ichki mahsulotga nisbatan budjet defitsiti 3,9 foiz yoki 35 trillion so‘m bo‘ldi. Budjet taqchilligining 24,4 trillion so‘mi ichki va tashqi qarz hisobiga, 4,7 trillion so‘mi budjetdan tashqari mablag‘lardan, 4,5 trillion so‘mi davlat aktivlarini xususiylashtirishdan tushgan mablag‘lardan qoplangan”, – degan u.
Mavzuga doir:
Izoh (0)