Нукус воқеалари бўйича судланганларнинг 16 нафари аппеляция берди

Нукус воқеалари бўйича судланган 22 кишининг 16 нафари судга аппеляция шикояти киритди. Бу ҳақда Олий суд матбуот котиби Азиз Обидов хабар қилди.

2022 йил 1—2 июль-кунлари Нукус шаҳридаги оммавий тартибсизликларни содир этганликда айбланган 22 нафар шахсга нисбатан 2023 йил 31 январь куни Қорақалпоғистон Республикаси судининг ҳукми эълон қилинганди.

Олий суд матбуот хизмати ахборотига кўра, биринчи инстанция судининг ҳукми устидан судланувчилар Д.Тажимуратов, П.Шамшетов (марҳум), С.Калимов, С.Каипов, А.Темирханов, С.Медетов, Н.Султанмуратов, А.Токимбетов, Р.Бекмуратов, Б.Сейтниязов, А.Адилбеков, П. Нурниязов, Н.Найипов, Б.Кадирбергенов, Д.Джиемуратов, Қ.Сейтимов ва уларнинг ҳимоячилари томонидан аппеляция шикояти киритилган.

Прокуратура томонидан эса мазкур суд ҳукмининг судланувчилар Л.Қаллиханова, А.Турданов, А.Сметуллаев ва А.Нуратдиновга оид қисмига нисбатан протест келтирилган.

Жиноят ишининг ушбу судланувчиларга оид қисми киритилган шикоятлар ва келтирилган протестга асосан Олий суднинг Жиноят ишлари бўйича судлов ҳайъати томонидан аппеляция тартибида кўриб чиқилади.