Туркия мухолифати Эрдўғонни президентлик сайловларидан четлаштиришни талаб қилмоқда
28 март куни Туркиядаги учта мухолифат партияси вакиллари Олий сайлов комиссиясига амалдаги президент Ражаб Тоййиб Эрдўғонни май ойида бўлиб ўтадиган президентлик сайловлари учун номзодлар рўйхатидан чиқариб ташлашни талаб қилиб, ариза топширди.
Яхши партия, Демократия ва ютуқ партияси ҳамда Ватан партияси аризасига кўра, Эрдўғоннинг номзоди конституцияга зид, чунки у аллақачон икки марта президент этиб сайланган. 2014 ва 2018 йиллардаги президентлик сайловларида ғалаба қозонган Эрдўғон фақат Туркия парламенти муддатидан олдин сайловлар эълон қилган тақдирда, учинчи марта номзодини қўйиш ҳуқуқига эга бўлар эди, дея таъкидлайди мухолифатчилар. Аммо 14 май куни бўлиб ўтадиган сайловни президентнинг ўзи белгилаган.
Ўз навбатида, 28 март куни ҳукмрон Адолат ва тараққиёт партияси спикери Ўмер Челик Эрдўғоннинг сайловларда иштирок этишига ҳеч қандай тўсиқ йўқлигини айтди. Унга кўра, 2018 йилда конституция ўзгартирилгандан сўнг у илк бор янги президентлик тизими бўйича сайланган, шу боис унинг аввалги президентлик муддати ҳисобга олинмайди. Конституциявий ҳуқуқ соҳасидаги туркиялик экспертлар қонун нормалари Эрдўғонга яна номзодини қўйишга имкон берадими ёки йўқми, деган масалада бир фикрга кела олмаяпти. Бу йилги сайловларда Туркия президентлигига номзодларнинг якуний рўйхати 31 март куни эълон қилиниши кутилмоқда.
