Қозоғистон ҳукумати истеъфога чиқди
Қозоғистон ҳукумати янги конституцияга мувофиқ, республика парламенти қуйи палатасининг сайловидан кейин бугун, 29 март куни VIII чақириқ парламентнинг биринчи сессияси бошланишидан олдин истеъфога чиқди. Республика президентининг тегишли қарори имзоланди ва Оқўрда сайтида эълон қилинди.
Фармонда Қозоғистон ҳукумати республика ҳукуматининг янги таркиби тасдиқланмагунча ўз вазифаларини бажариши айтилади.
Аввалроқ бош вазир Алихон Смаилов Вазирлар Маҳкамаси янги сайланган парламентга истеъфо беришга тайёрланаётгани ҳақида маълум қилганди. Янги ҳукумат тузилгунга қадар ҳукуматнинг барча аъзолари ўз вазифаларини бажаради.
“Янги бош вазир ким бўлиши президент ва Мажлиснинг ихтиёрида. Табиийки, биз ҳар қандай вазиятга тайёр турамиз”, — деди Смаилов.
Алихон Смаилов бошчилигидаги ҳукумат 2022 йил январь воқеаларидан кўп ўтмай тузилганди. Ўтган бир йилдан ортиқ вақт ичида Вазирлар Маҳкамаси таркибида ҳам, тузилмасида ҳам ўзгаришлар бўлди.
