Кремл Путин нима учун босиб олинган Мариуполга борганини маълум қилди
Россия президенти Владимир Путин рус ҳарбийлари томонидан босиб олинган Мариуполга унинг қайта тикланганига ишонч ҳосил қилиш учун борди. Бу ҳақда Кремл матбуот котиби Дмитрий Песковга таяниб, “РИА Новости” хабар берди.
.jpg)
“Ривожланиш, янги ҳудудларни тиклаш, албатта, президентнинг кеча-ю кундуз назорати остида бўлган мавзу, шунинг учун у ҳамма нарсани жойида кўришга қарор қилди”, — деди Путиннинг матбуот котиби Дмитрий Песков.
Россия президенти 19 март кун Мариуполга вертолётда учиб кетган, шундан сўнг у шаҳарнинг бир қанча туманларини машинада айланиб чиққан. Невский микрораёнида у шаҳар аҳолиси билан суҳбатлашган, шунингдек, қирғоқ бўйи, яхта-клуб ҳудуди, шаҳарнинг тарихий жойларини бориб кўрган. Шундан сўнг у Ростов-Донга жўнаб, у ердаги “махсус ҳарбий операция” қўмондонлик пунктида йиғилиш ўтказган.
Украина президенти офиси раҳбари маслаҳатчиси Михаил Подоляк Путиннинг аннексия қилинган Мариуполга ташрифи ҳақида фикр билдирган. У “жиноятчи ҳар доим жиноят содир бўлган жойга интилишини” қайд этган.
“Цивилизациялашган дунё мамлакатлари ‘уруш режиссёри’ (Путин) чегарани кесиб ўтса, ҳибсга олинишини эълон қилаётган бир пайтда, минглаб Мариупол оилаларининг қотиллик ташкилотчиси шаҳар вайроналари ва оммавий қабрларни томоша қилиш учун келди”, — деган Подоляк.
Украина Мудофаа вазирлиги эса “Путин худди ўғридек тунда Мариуполга ташриф буюрганини” қайд этган. Айримлар Путиннинг Мариуполга ташрифини Халқаро жиноий суднинг уни ҳибсга олиш ордерига жавоб эканини билдирди.
Халқаро Гаага суди 17 март куни Россия президенти Владимир Путинни ҳибсга олишга ордер берди. Россия президенти Украинанинг босиб олинган ҳудудларидан болаларни Россияга ноқонуний равишда депортация қилганликда гумонланмоқда. Шунингдек, суд Россиянинг болалар ҳуқуқлари бўйича комиссари Мария Львова-Беловани ҳибсга олиш учун ҳам ордер берган.
Маълумот учун, Путин “Рим статути”ни ратификация қилган 123 та давлатнинг бирига ташриф буюрган тақдирда маҳаллий ҳокимият томонидан ҳибсга олиниши ва судга тортилиши керак. Бундай давлатлар орасида Тожикистон ҳам бор.
