Қатл, очлик ва зўрлаш: Шимолий Корея қамоқхоналаридаги ҳаёт қандай?

Шимолий Кореядан қочиб кетишга муваффақ бўлган собиқ маҳбуслар қамоқхоналардаги шароитлар ҳақида гапирди. Уларнинг кўрсатмалари Коrеа Future инсон ҳуқуқлари ташкилоти ҳисоботида келтириб ўтилди. Бу ҳақда CNN хабар берди.

Собиқ маҳбусларга кўра, Шимолий Корея қамоқхоналарида судсиз қатл қилиш, зўрлаш, мажбурий аборт қилиш, қийноқлар содир этилган. Уларга деярли овқат берилмаган, шунинг учун баъзи маҳбуслар ҳашаротларни ейишга мажбур бўлган.

Ҳуқуқ ҳимоячилари мамлакатдан қочишга муваффақ бўлган собиқ маҳбуслар билан юзлаб суҳбатлар ўтказган. Улардан расмий ҳужжатлар ва сунъий йўлдош тасвирларини ҳам олган.

“Совет ахлоқ тузатиш меҳнат лагерларига нисбатан Шимолий Корея жазони ижро этиш тизими суд томонидан ҳукм қилинган шахсларни хавфсиз ва инсонпарвар муассасаларда сақлаш ва реабилитация қилишга мўлжалланмаган. Бу Ким Чен Иннинг ҳукуматига қарши бўлган одамларни жамиятдан ажратиб қўйиш мақсадида амалга оширилади”, — дейилади ташкилот баёнотида.

Korea Future Шимолий Кореянинг ҳар бир провинциясида 206 та қамоқхонани топишга муваффақ бўлди. Қонунбузарликларга шахсан юқори мартабали амалдорлар, генерал майорлар йўл қўйиши аниқланган.

Ҳисоботда Шимолий Корея разведка идораларининг ўз аҳолисига қарши жиноятлари ҳам ўрин олган. Мисол учун, чегарани кесиб ўтишга уринган уч киши қамоққа ташланган. Улар орасида аёл ҳам бўлиб, у ҳомиладорликнинг еттинчи ёки саккизинчи ойида аборт қилишга мажбурланган. Яна бир одамга кунига атиги 80 грамм маккажўхори берилган, натижада унинг вазни бир ой ичида 60 килограммдан 37 килограммгача тушиб кетган. У овқатни ўрнини тўлдириш учун суварак ва кемирувчиларни истеъмол қилишга мажбур бўлган.

Қамоқхонадаги қийинчиликни бошдан кечирган яна бошқа гувоҳлар ҳайвонларнинг овқатини истеъмол қилишгани, оқибатда озиб кетишганини айтди. Улар зўрлаш ва қаттиқ калтакланишга ҳам гувоҳ бўлганини билдирди.

Бундан ташқари, БМТ ўз терговида инсон ҳуқуқлари фаоллари билан бир хил хулосага келган. Инсон ҳуқуқлари ташкилоти ҳисоботида айтилишича, сиёсий қамоқ лагерларида сақланаётган аёллар Шимолий Корея расмийлари томонидан қийноқ ва шафқасиз муомала, мажбурий меҳнат ҳамда жинсий зўравонликка дучор бўлган.