Бобур Мансуров блогерларни ёмон кўргани ва Россияга кетаётганида уни Элмурод Ҳақназаров тўхтатиб қолгани ҳақида гапириб берди (видео)

Instagram оламида бир миллион кузатувчига эга актёр, вайнер Бобур Мансуров “Дарё” интернет-нашри учун эксклюзив интервью берди. Интервьюни журналист Феруз Муҳаммад ташкиллаштирди.

“Ҳақиқатан қайси даврага борсам, блогерларни кўриб, ўзимнинг жаҳлим чиқарди”

— Бир куни Ибрат деган дўстим менга вайнерлар ҳақида сўз очиб қолди. “Блогер, вайнерларга қара, улар машина, уй оляпти, қолаверса, таниляпти”, деди. Ҳақиқатан қайси даврага борсам, блогерларни кўриб, ўзимнинг жаҳлим чиқарди. “Нима, блогерларчалик актёрларнинг ҳурмати йўқми”, дердим. Блогерларнинг ишини осон деб ўйлардим.

Дўстларим менга ҳам “вайнлар суратга олайлик”, деганида ўзимга эп кўрмадим. Кейин бир қилиб кўрайлик, деган гаплардан кейин суратга олиб кўрдик. Ўзимизнинг яқинлар қўллаб-қувватлагани билан кўпчилик, “қилган ишингни қара” деб устимиздан кулди. Орада ишимизни тўхтатдик. Сабаби видеоларда сўкиниш саҳналарни қўшган эдик. Ўзимизга эриш туюлса-да, видео кенг тарқалишига ҳисса қўшармикан, деб ўйлаган эдик. Уйдагилардан гап ҳам эшитдик, “Сен нима қиляпсан, бемалол сўкинаётганингни устозларинг кўряптими, шунинг учун ўқидингми?”, дейишарди.

Шунда дўстларимга “йиғиштирайлик, кўнглим қолди”, деб айтдим. Кейин эса “бўлди, бу иш бўлмаяпти, қўйинглар, мен Россияга кетаман”, деб қароримни айтдим.

Шу орада Самарқандда Обиджон Насриддиновнинг тўйи бўлди. Обиджоннинг тўйига борсам, қўшни столда Элмурод Ҳақназаров ўтирган экан. Мен уларнинг мухлиси эдим, барча вайнларини мириқиб томоша қилар эдим. Шунда Шаҳриёр деган дўстим мени Элмурод Ҳақназаров сўраётганини айтиб қолди.

“Элмурод Ҳақназаров билан суҳбатдан 10 кун ўтганидан сўнг реклама таклифи келиб тушди”

— Кейин Элмурод ака олдимга келиб, “мен сизни мухлисингизман, TikTokъда сизни кузатаман”, деб айтдилар. Мен уларни яхши кўриб кузацам, улар менинг мухлисим эканини айтди. Шунда улар менга, “фақат сўкинманг, видеоларингиз мавзуси яхши, фақат сўкинилган жойлари борлиги учун одамлар бир-бирига жўнатолмайди”, деди. Шунда Шаҳриёр мени Россияга кетмоқчи бўлиб юрганимни айтиб қолди. Элмурод ака эса бизга мотивация бериб, “озгина сабр қилинг, мен шу соҳанинг ичида юрганимга 9 йил бўлганидан кейин пул топишни бошлаганман” деди.

“Бизни Элмурод ака кўрар экан, ҳаракат қилайлик”, деб ижодда давом этдик. Ҳақиқатан ҳам видеоларимиз қамрови ва кўришлар сони ўсиб борди. Лайк тугмасини босганлар орасида машҳур санъаткорлар чиқиб қолишни бошлади.

Элмурод Ҳақназаров билан суҳбатдан 10 кун ўтганидан сўнг реклама таклифи келиб тушди. Кейин-кейин реклама таклифи билан тинимсиз қўнғироқлар бўла бошлади. Бирор жойда ўтирсак, кетма-кет қўнғироқлар бўлиб, бизга реклама бермоқчи эканликларини айтишарди. Мен ҳаммаси Худодан дедим, Худо ҳам охиригача сабрингизни синар экан. Бу кутилмаганда мўжизадек бўлди. Икки ой ичида кўчада одамлар мен билан суратга тушишни сўрай бошлади.

Шунда жамоамиздаги йигитларга бунинг қадрига етиш керак, ишлаш керак, ҳаракат қилиш керак, дедим. Сиз яхши ижод қилишдан тўхтамасангиз, бу ўткинчи ҳолат бўлмайди. Агар ана шунда сабрсизлик қилиб қўйганимда, эҳтимол, Россияда ҳозир юк ташиётган бўлар эдим.

Маълумот учун, Бобур Мансуров 1992 йилда Сирдарё вилояти Ховос туманида дунёга келган. Ўзбекистон санъат ва маданият институтида таҳсил олган. Режиссёр сифатида 60 қисмдан иборат “Орзулар палатаси” деб номланган сериални суратга олган. Бугунги кунда Instagram тармоғида 1 миллиондан ортиқ кузатувчиси бор.

Батафсил репортажни қуйида томоша қилишингиз мумкин.