“Гумондор шахсга ўхшайсиз, дейишади”. Актёр Улуғбек Муҳаммадкаримов актёрлик маҳорати сабабли “гумондор шахс”га айланиб қолгани ҳақида гапирди (видео)

Ўзбек кино оламида асосан салбий қаҳрамонларнинг маҳоратли ижрочиси сифатида танилган актёр Улуғбек Муҳаммадкаримов “Дарё” интернет-нашрига эксклюзив интервью берди. Интервьюни журналист Феруз Муҳаммад ташкиллаштирди.

Улуғбек Муҳаммадкаримов суҳбат давомида доимий салбий ролларни ижро этгани сабабли гумондор шахсга айланиб қолгани ҳақида гапириб берди.

“Мени фақат салбий ролларга таклиф қилишади. Масалан: ваҳобий, ҳизбий ҳамда мафияларнинг образини гавдалантириб беришимни сўрашади. Мен ҳозирда Назарбекда тураман. Шаҳарга келган-кетганимда постдан ўтаман. Ҳар сафар орган ходимлари мени тўхтатиб, ҳужжатларимни сўрашади. “Нимага мени тўхтатдинг, сабаби борми”, десам, “гумондор шахсга ўхшайсиз”, дейишади. Постларда доим бир хил ходимлар турмайди. Улар тез-тез алмашиб туришади. Нафақат улар, кўчада ким билан гаплашсам ҳам бошқача гаплашади. Уларнинг хотирасига салбий ролларим муҳрланиб қолган. Режиссёрлар ҳам салбий рол бўлса, мени эслашади. Менга ҳам бошқа роллар берса, қойил қилолмасак ҳам бундайроқ бўлса ҳам ижро этарман.

Немислар билан рус киноижодкорлари Ўзбекистонда фильм суратга олишганида ҳам хориж фильмларида фақат салбий рол ижро этганман. Қизиғи, русларнинг сериалига кастинг топширганимдан сўнг аварияга учрадим, юзим йиртилиб кетган эди. Ана шу пайтда менга қўнғироқ қилиб, “Кейинги ҳафтадан суратга олиш жараёнлари бошланади, сизга костюм тикишимиз керак”, дейишди. Мен автоҳалокатга учраб, юзимни жароҳатлаб олганимни айтсам, “Қўл-оёғингиз бутун бўлса келаверинг”, дейишди. Борганимда режиссёр мени кўриб, грим хонасига жўнатди. У ерда мен киссавурнинг ролини ўйнашим керак эди. Гримчи эса менга қараб, “сенга грим шарт эмас, тайёр грим билан келибсан”, деган.

Ўша фильмларда кунига 200 доллар гонорар олганман. Яна бир Россия томонидан ишланган кинода русларнинг машинасига бомба қўядиган афғон роли билан чиққанман. Ундан ташқари, бир неча йил аввал мени ваҳобийлар ҳақидаги ҳужжатли фильмга таклиф қилишди. Баҳриддин ака деган режиссёр менга ваҳобийлар ролини ўйнаб берасан, деб айтдилар. Ана шу фильм биринчи президентимиз Ислом Каримовнинг буйруғи бўйича бўлгани учун тепамизда ижодий гуруҳдан ташқари кўплаб раҳбарлар турарди.

Сценарийни ўқиб, ҳар хил репетиция қилиб турсам, тепамга биттаси келиб, “Қандай ёзилган бўлса, шундай ўқиб бер, бирорта ҳам сўзи қолиб кетмасин”, деб айтди. Қарасам битта йигит турибди. Ана ўшанда “Менга қара, сен кимсан? Сур бу ердан”, деб айтдим. Чиқиб режиссёрдан суратга олиш майдончасида фақат фильмга тааллуқли одамлар қолишини талаб қилганман”, — дейди актёр. 

“Инсонларнинг нигоҳидан улар менга қандай қараётгани сезилиб туради”

— “Афв” фильмида ҳам ғаламис одам ролини ўйнаб чиқдим. У ерда бош қаҳрамонларга зарарим тегар эди. Суратга олиш жараёнлари совуқда бўлаётганди, мени калтаклашадиган саҳнада калтак еётган инсонни юз қиёфасини кўрсатиб берсам, оператор чиндан ҳам мени қийналяпти деб ўйлаб, камерасини ўчирди-да, “ёрдам беринглар”, деб бошқаларни ёрдамга чақирди. Кейин эса операторга “Bekoр тўхтатдинг, менда ҳаммаси жойида эди”, деганман.

Лойга булғаниб, оёқ тагида қолган вақтингиз камерачилар тўхтаб қолса, чатоқ бўлар экан. Яқинда “Қодирхон” сериалида ҳам суратга тушдим. У ерда ҳам салбий образда эдим, суратга тушган саҳналарим икки кун ўтиб эфирга кетгани учун мени кўпчилик таниб қолди.

Мени таниган инсонлар ўйнаган салбий ролларимга нафрат билан қарагани сабаб мени ҳам ёмон кўриб қолган. Инсонларнинг нигоҳидан улар менга қандай қараётгани сезилиб туради. “Сизнинг ижронгиз ишонарли чиққани учун томошабинлар шундай фикрга келиб қолган”, деб айтганлар ҳам бўлган. Кўп актёрларни кинога таклиф қилишганида агар образ ёқмаса, улар бормайди. Менда эса ундай бўлмаган, “пулини берса ўйнаб бераман”, деганман. Кейин қарасам, менга фақат шунақа роллар берадиган бўлишди.

Менинг олдимга ҳам чиройли қизни қўйиб, қўлимга гул бериб, “Анави қизга севги изҳор қиладиган жойингиз, кўрсатиб беринг” дейишса, мен ҳам шу ишни қилоламан. Лекин негадир режиссёрлар мени бошқачароқ ролларда синаб кўришдан, тасаввур қилишдан қочади. Шунақа гаплар.

Маълумот учун, Улуғбек Муҳаммадкаримов 1970 йил 18 август куни Тошкент шаҳрида дунёга келган. Театр ва рассомчилик институтининг актёрлик йўналишида таълим олган. Оилали, тўрт фарзанднинг отаси.

Батафсил репортажни қуйида томоша қилишингиз мумкин.