Instagram olamida bir million kuzatuvchiga ega aktyor, vayner Bobur Mansurov “Daryo” internet-nashri uchun eksklyuziv intervyu berdi. Intervyuni jurnalist Feruz Muhammad tashkillashtirdi.
“Haqiqatan qaysi davraga borsam, blogerlarni ko‘rib, o‘zimning jahlim chiqardi”
— Bir kuni Ibrat degan do‘stim menga vaynerlar haqida so‘z ochib qoldi. “Bloger, vaynerlarga qara, ular mashina, uy olyapti, qolaversa, tanilyapti”, dedi. Haqiqatan qaysi davraga borsam, blogerlarni ko‘rib, o‘zimning jahlim chiqardi. “Nima, blogerlarchalik aktyorlarning hurmati yo‘qmi”, derdim. Blogerlarning ishini oson deb o‘ylardim.
Do‘stlarim menga ham “vaynlar suratga olaylik”, deganida o‘zimga ep ko‘rmadim. Keyin bir qilib ko‘raylik, degan gaplardan keyin suratga olib ko‘rdik. O‘zimizning yaqinlar qo‘llab-quvvatlagani bilan ko‘pchilik, “qilgan ishingni qara” deb ustimizdan kuldi. Orada ishimizni to‘xtatdik. Sababi videolarda so‘kinish sahnalarni qo‘shgan edik. O‘zimizga erish tuyulsa-da, video keng tarqalishiga hissa qo‘sharmikan, deb o‘ylagan edik. Uydagilardan gap ham eshitdik, “Sen nima qilyapsan, bemalol so‘kinayotganingni ustozlaring ko‘ryaptimi, shuning uchun o‘qidingmi?”, deyishardi.
Shunda do‘stlarimga “yig‘ishtiraylik, ko‘nglim qoldi”, deb aytdim. Keyin esa “bo‘ldi, bu ish bo‘lmayapti, qo‘yinglar, men Rossiyaga ketaman”, deb qarorimni aytdim.
Shu orada Samarqandda Obidjon Nasriddinovning to‘yi bo‘ldi. Obidjonning to‘yiga borsam, qo‘shni stolda Elmurod Haqnazarov o‘tirgan ekan. Men ularning muxlisi edim, barcha vaynlarini miriqib tomosha qilar edim. Shunda Shahriyor degan do‘stim meni Elmurod Haqnazarov so‘rayotganini aytib qoldi.
“Elmurod Haqnazarov bilan suhbatdan 10 kun o‘tganidan so‘ng reklama taklifi kelib tushdi”
— Keyin Elmurod aka oldimga kelib, “men sizni muxlisingizman, TikTok’da sizni kuzataman”, deb aytdilar. Men ularni yaxshi ko‘rib kuzatsam, ular mening muxlisim ekanini aytdi. Shunda ular menga, “faqat so‘kinmang, videolaringiz mavzusi yaxshi, faqat so‘kinilgan joylari borligi uchun odamlar bir-biriga jo‘natolmaydi”, dedi. Shunda Shahriyor meni Rossiyaga ketmoqchi bo‘lib yurganimni aytib qoldi. Elmurod aka esa bizga motivatsiya berib, “ozgina sabr qiling, men shu sohaning ichida yurganimga 9 yil bo‘lganidan keyin pul topishni boshlaganman” dedi.
“Bizni Elmurod aka ko‘rar ekan, harakat qilaylik”, deb ijodda davom etdik. Haqiqatan ham videolarimiz qamrovi va ko‘rishlar soni o‘sib bordi. Layk tugmasini bosganlar orasida mashhur san’atkorlar chiqib qolishni boshladi.
Elmurod Haqnazarov bilan suhbatdan 10 kun o‘tganidan so‘ng reklama taklifi kelib tushdi. Keyin-keyin reklama taklifi bilan tinimsiz qo‘ng‘iroqlar bo‘la boshladi. Biror joyda o‘tirsak, ketma-ket qo‘ng‘iroqlar bo‘lib, bizga reklama bermoqchi ekanliklarini aytishardi. Men hammasi Xudodan dedim, Xudo ham oxirigacha sabringizni sinar ekan. Bu kutilmaganda mo‘jizadek bo‘ldi. Ikki oy ichida ko‘chada odamlar men bilan suratga tushishni so‘ray boshladi.
Shunda jamoamizdagi yigitlarga buning qadriga yetish kerak, ishlash kerak, harakat qilish kerak, dedim. Siz yaxshi ijod qilishdan to‘xtamasangiz, bu o‘tkinchi holat bo‘lmaydi. Agar ana shunda sabrsizlik qilib qo‘yganimda, ehtimol, Rossiyada hozir yuk tashiyotgan bo‘lar edim.
Ma’lumot uchun, Bobur Mansurov 1992-yilda Sirdaryo viloyati Xovos tumanida dunyoga kelgan. O‘zbekiston san’at va madaniyat institutida tahsil olgan. Rejissor sifatida 60 qismdan iborat “Orzular palatasi” deb nomlangan serialni suratga olgan. Bugungi kunda Instagram tarmog‘ida 1 milliondan ortiq kuzatuvchisi bor.
Batafsil reportajni quyida tomosha qilishingiz mumkin.
Izoh (0)