Санъат вакиллари орасида ҳаёт завқини тотмай туриб, бу оламдан ўтганлари талайгина. Уларнинг айримлари 30 ёшни ҳам қаршилашга улгурмаган. Улар қисқа умр кўрган бўлса-да, самарали ижод қилди ва одамлар меҳрини қозонди.
23 ёшида пичоқланган Лайло
“Ўзбекистон”, “Жонгинам”, “Ёндиради” каби қўшиқлари билан миллионлаб тингловчилар қалбига кириб борган хонанда Лайло Алиева 23 ёшида қотиллик қурбони бўлган.
1975 йилда Самарқанд шаҳрида зиёлилар оиласида туғилган ижодкор Тошкентда улғайган. Унинг катта бобоси машҳур заргарлардан бири эди. Лайло Алиева икки ёшга кирганида “Мода” журналида расмлари чиқади, ўн ёшида эса “Семурғ” оромгоҳидаги “Гўзаллик” танловида юқори ўринга лойиқ кўрилади. У ҳозирги Миллий рақс ва хореография олий мактабини битиргач, Ўзбекистон Давлат консерваториясида ўқийди. Ўзбекистон халқ артисти Саодат Қобулованинг севимли шогирдларидан бири ҳисобланган хонанда Ўзбекистон халқ артисти Фаррух Зокировдан ҳам қўшиқ айтиш сирларини ўрганади. Қисқа вақт ичида ширали овози ва гўзаллиги билан омма назарига тушиб, мухлислар орттиради. Хонанда оз умри давомида йигирмадан зиёд қўшиқлар ижро қилиб, иккита альбом чиқаради.
Лайло Алиеванинг фожиали ўлими яшин тезлигидек тарқалиб, барчани ҳайратга солади. Маълумотларга кўра, 1998 йилнинг 1 май куни ўша вақтда машҳур бўлган “Ал-Вакил” гуруҳининг икки нафар йигити хонандани яшаш уйида қирқ икки жойидан пичоқлаб, ваҳшийларча ўлдиради. Унинг Жасурбек исмли фарзанди бор эди.
Автоҳалокат қурбони бўлган Мўмин Орипов
“Жийда гуллаганда”, “Бойвачча”, “Анҳор бўйида”, “Эслама мени” каби қўшиқлари билан ўзбек ёшлари орасида шуҳрат қозонган “Божалар” гуруҳи аъзоси Мўмин Орипов ҳам ҳаётдан эрта кўз юмган.
“Бойвачча”, “Нортой”, “Аччиқ ҳаёт” сингари фильмларда турли даражадаги ролларни талқин қилган серқирра ижодкор 25 ёшида бахтсиз ҳодиса туфайли вафот этган. Мазкур нохуш воқеа 2009 йилнинг 28 июнидан 29 июнига ўтар кечаси Сурхондарё вилоятининг Ангор туманида юз берган. Автоҳалокат оқибатида гуруҳ аъзоси Жаҳонгир Позилжонов ва Жавлон Шодмонов оғир тан жароҳатлари олган ҳамда ойлаб шифохонада ётиб, оёққа турган.
28 ёшида оламдан ўтган бошловчи
Сухандон ва хонанда сифатида танилган Дилдора Қаюмова 28 ёшида вафот этган. У 1980 йил 19 декабрда Наманган вилоятида туғилган. Устазода ижодкор таниқли телевидение режиссёри Зокир Қаюмов ва Ўзбекистон халқ артисти Малика Қаюмованинг фарзанди бўлиб, карьерасини 1998 йилда Ўзбекистон телевидениесида бошлаган.
“Унутмоқ осонмас”, “Мусиқий танаффус”, “Янги йилда янги қўшиқлар” каби бир қанча лойиҳалардаги чиқишлари билан эл назарига тушган. Хонандаликда ҳам бир қанча тароналари билан ўз мухлисларини топган. Дилдора Қаюмова 2008 йилда оламдан ўтган. Унинг бир нафар ўғил фарзанди бор.
Контрабандачилар қурбонига айланган Radius 21
Radius 21 номи билан машҳурликка эришган рэпер Шаҳзод Ғуломов ўн бир йил олдин 29 ёшида автоҳалокат сабабли оламдан ўтган.
У 1981 йил 10 октябрда Бўка шаҳрида дунёга келган. Болалигидан гитара чалиш, китоб ўқиш ва шеър ёзишга жуда қизиқувчан бўлган. Мактаб ва техникумни тамомлагач, ҳозирги Ўзбекистон давлат санъат ва маданият институтининг оммавий байрамлар режиссёрлиги факультетида ўқийди. Олий таълим муассасасини битирганидан кейин хусусий телеканалларнинг бирида икки йил давомида бошловчи ва режиссёр сифатида фаолият юритади. Унинг “Radius 21” номли кўрсатуви тез орада томошабинлар эътиборини қозонади.
Шу тариқа қўшиқ айтишга бўлган иштиёқ уни санъат соҳасига етаклайди. Бир қатор мусиқа йўналишида ижод қилган хонанданинг реп йўналишидаги қўшиқлари ёшлар орасида кенг оммалашади. Унинг “Akfa media” продюссерлик марказида ижод қилган даврида, яъни 2006—2008 йилларда ҳамда кейинчалик яратган “Дубай”, “Унутолмадим”, “Монолог”, “Ҳар кун”, “Тунги капалак” сингари кўплаб тароналари ҳалигача тингловчиларини йўқотмай келмоқда. Шаҳзод Ғуломов “Севги фазоси”, “Онаизор”, “Бойвачча” каби фильмларда суратга тушган.
Марҳум санъаткорнинг укаси Бекзод Ғуломов акаси 2010 йилнинг 12 сентябрида Пискент шаҳри постига яқин жойда Matiz русумли машинасида оиласи билан фалокатга учраганини айтиб ўтган. Уларга қарама-қарши йўналишдан эса контрабанда маҳсулотларини постдан олиб қочаётганлар келиб урилган. Шаҳзод Ғуломов автоҳалокат бўлган вақтда, воқеа жойининг ўзида оламдан ўтган, 3,5 ойлик фарзанди Бексултон эртаси куни вафот этган. Бексултон хонанданинг ёлғиз фарзанди эди.
Пиёдалар ўтиш жойидаги бахтсиз ҳодиса
“Ойижон” фильмидаги бош роли билан танилган ижодкор Фарангиз Режаметова (Жамолхонова) 2018 йилда автоҳалокат оқибатида вафот этган. У эндигина 25 ёшни қаршилаган эди.
У 1993 йилда санъаткорлар оиласида туғилган. Унинг бобоси — Ўзбекистон ССРда хизмат кўрсатган артист Тўғон Режаметов, бувиси — Ўзбекистон халқ артисти Ширин Азизова кино ва театрдаги юзлаб роллари орқали ўзбек санъати ривожига ҳисса қўшган. Онаси — Ўзбекистонда хизмат кўрсатган артист Фотима Режаметова ҳам бетакрор ижролари орқали томошабинлар кўнглидан жой олган. Фарангиз Режаметова “Сеҳрли қалпоқча”, “Уй бекаси” каби ўнлаб кино ва сериаллардаги ижролари билан ҳам ўз мухлисларини топган.
Ўзбекистон Давлат жаҳон тиллари университети халқаро журналистика факультети битирувчиси ҳисобланган 25 ёшли Фарангиз Режаметовани 2018 йил 20 июль куни соат 21:15 атрофида Абдулла Қодирий ва Маҳатма Ганди чорраҳасидаги пиёдалар ўтиш жойида Mercedes-Benz машинаси уриб кетган. Ҳайдовчи жабрланувчини касалхонага олиб борган, аммо актриса йўлда ҳаётдан кўз юмган.
Операцияга кириб, омон чиқмаган вайнер
Mittivine кулги жамоаси асосчиси Фарҳод Манноповнинг ўлими унинг мухлислари қалбини ларзага келтирди. У эндигина 27 ёшни қаршилаган эди. У хусусий клиникалардан бирига бурун шаклининг қийшайиши ва олган жароҳати сабаб мурожаат қилган. Операсия пайтида унинг юраги уришдан тўхтаган.
Фарҳод Маннопов отасиз, камтарона оилада улғайганини яширмасди. У вайнерлик фаолиятини бошлашдан аввал ўқиш билан бирга, офисиантлик ҳам қилган. 2020 йили яқин дўсти Улуғбек Шодибеков билан ҳамкорликда вайнерлик фаолиятини бошлаганди.
Унинг ўлими билан боғлиқ хабар яшин тезлигида тарқалди. Дўсти Улуғбек Шодибеков ўз интервьюсида Фарҳод Манноповнинг ўлим тафсилотлари ҳақида сўзлаб берганди.
Изоҳ (0)