Марҳум хонанда Мўмин Ориповнинг онаси Жамила Орипова “Дарё”га берган интервьюсида ўғли автоҳалокатга учраган кундаги воқеалар ҳақида сўзлаб берди.
— Ажал кутилмаган пайтда келади. Ўғлим автоҳалокатга учрамасидан аввал Тожикистонга ҳамдўстлик концерти муносабати билан борганди. 28 июнь куни гаплашганимда “Она, биз Ўзбекистонга ўтдик, ҳозир Сурхондарёдамиз”, деди. Эртаси куни эрталаб кичкина ўғлим Маъмурхўжа “Ўзбекфильм” студиясига борганда Ойбек ва Нигоранинг продюсери билан учрашган. Ундан авария ҳақида эшитибди. “Кечқурун гаплашгандим, яхши эди-ку”, деб ўзимни йўқотиб қўйдим. Энг ёмони, ўлган инсон ҳақида ҳам турли бўҳтонлар тарқатишди. Ҳатто ўзимга ҳам бу ҳақда айтишганида қаттиқ ранжидим. “Ичиб олиб, маст бўлган экан, машинада қизлар билан экан”, деган гаплар юрагимга оғир ботди. Ўзи машинада тўртта йигит бўлса, бундан ташқари, уларнинг ҳаммаси ибодатда бўлса, қанақасига бу тахминлар асосли бўлиши мумкин, дедим. Ўғлим келиним Камоладан бошқасига қарамасди. Улар бир-бирини шунчалик яхши кўрардики, Мўминхўжанинг бошқа қизга кўз сузиши ҳақида гап-сўз ҳам бўлиши мумкин эмасди.
Келинимни ўғлимнинг ўзи топганди. Билсам, Жавлон Шодмонов Жаҳон тиллари университетида концерт қилганида, Мўминхўжа Камолани учратиб қолган экан. Дадаси раҳматли ҳам “Танлаганини олиб берамиз, бўлмаса, ҳаёти бузилиб кетади”, деб тўйга қарши бўлмаганди.
Ўғлимнинг тўйига бир ярим минг одам келган бўлса, жанозасида ўн мингдан ортиқ одам иштирок этди. “Дом”нинг атрофига тумонат одам тўлган. Ҳатто жанозасини ўқийдиган домла “Қайси вазирни олиб келишяпти?”, деган экан. Яқинда вафот этган Фарҳод Манноповнинг онасига ҳам гўзал сабр тилайман. Бу кунлар менинг ҳам бошимдан ўтган. Фарзандидан айрилиш оғир, аммо чидашдан ўзга чорамиз йўқ.
Камола ва набирам Билолхўжа билан алоқаларимиз яхши. Кўргани келишади, ҳамиша уларни дуо қиламан. Яқинда она-бола “Жийда гулим” қўшиғини ижро этишибди. Жуда қувондим, от ўрнини той босганини кўриб, саҳнада ўғлимни кўргандек бўлдим.
Агар набирам санъаткор бўлса, отасининг диплом ишини бермоқчиман. Ўғлим қисқа умр кўрди, аммо сермазмун яшади, деб ўйлайман. Чунки вафот этганига 14 йил бўлди. Агар ёмон инсон бўлганида, одамлар аллақачон унутиб юборишган бўларди. Ҳалигача уйимизга келиб, ҳол-аҳвол сўрайдиган мухлислари, ҳамкасблари бор. Камоланинг акаси ўғлига Мўминхўжа деб исм қўйди. Бизнинг уйда ҳам кичик Мўминхўжа бор. Бир нечта дўстлари ҳам ўғлимга ҳавас қилиб, фарзандига шу исмни қўйди. Илоҳим, ҳаммаларининг фарзандлари ўғлимдек ақлли-ҳушли, иймонли бўлишсин. Аммо ҳеч бирларининг ҳаёти Мўминхўжаникидек қисқа бўлмасин.
Жавлон Шодмонов Мўминхўжа билан синфдош бўлган. У Жаҳонгир Позилжонов билан бирга мени Умра сафарига жўнатди. Турмуш ўртоғим вафот этганида ҳам Мўминхўжанинг ўрнига ўғил бўлиб, охирги манзилга кузатишди. Улардан миннатдорман, — дейди Мўмин Ориповнинг онаси Жамила Орипова.
Қуйида суҳбатни тўлиқ ҳолда томоша қилишингиз мумкин.
Изоҳ (0)