Ке Хюи Куан — “Ҳаммаси ҳар жойда ва бирданига” фильмида “Энг яхши иккинчи пландаги актёр” номинациясида “Оскар” мукофотини олган ва Голливудни болалигидаёқ забт этган актёр. Бироқ муваффақиятдан кейин уни ўнлаб йиллар давомида унутишди. “Менинг саёҳатим қайиқда бошланди. Мен бир йилни қочқинлар лагерида ўтказдим ва бугунга келиб эса Голливуддаги энг катта саҳнага чиқдим”, — дейди у тақдирлаш маросимидаги нутқида.
Қайиқда келган муҳожирлар
Ке Хюи Куан ҳаётининг ўзи кино сценарийсига ўхшайди.
Бола етти ёшга тўлганда, унинг оиласи Вьетнамдан қочиб кетади. Куан отаси билан 1978 йилда Гонконгга, онаси эса учта ака-сингиллари билан Малайзияга келган. Бир йил ўтгач, оила Қўшма Штатларда яна бирлашади. Америкага улар қайиқда сузиб келишади — ва ниҳоят муҳожирлар қолишни орзу қилган мамлакатларга етиб боришади.
“Биз қочоқлар эдик”, — дейди актёр Guardian нашрига берган интервьюсида. Бизни ҳеч кимга керак эмасдик. Мактабда устимиздан кулишарди. Бу нарса боланинг руҳиятига қандай таъсир қилишини тасаввур қилишингиз мумкин”. Куан бошидан кечирган бу воқеаларни травматик деб таърифлайди.
Янги бурилиш
Унинг ҳаёти 12 ёшида тўсатдан ва бутунлай кутилмаганда ўзгарди. Куан укасини қўллаб-қувватлаш мақсадида “Индиана Жонс ва тақдир ибодатхонаси”даги ёш киссавур Митивой роли учун кастингга боради. Куаннинг ўзи кастингда қатнашмоқчи эмасди, лекин Стивен Спильберг уни ҳам синаб кўришга таклиф қиладиди. Натижада бу ролга Ке Хюи Куан маъқулланади.
Уч ҳафта ўтгач, у суратга олиш ишлари бошланаётган Шри-Ланкага йўл олади. “Бу ҳаётимдаги энг бахтли даврлардан бири эди. Миттивой — қувноқ ва жасур болакай, у Индига доим ёрдам беради”, дейди Куан ва Стивен Спильберг Голливуд блокбастерида биринчи бўлиб осиёлик қиёфасини кўрсатганини қўшимча қилади. Фильм 1984 йилда экранларга чиқди ва блокбастерга айланди.
Келгуси йили у Шон Астин, Жош Бролин, Кори Фельдман ва Марта Плимптон каби актёрлар билан бир қаторда “Такасалтанглар” фильмида гаджетни яхши кўрадиган Дате ролини ўйнайди. “Такасалтанглар” ҳалигача болалар фильмларининг классикаси ҳисобланади.
Аммо 1990 йиллар бошланиши билан таклифлар камаяди. Унга юборилган ҳар қандай сценарий роллари кичик ва стереотип эди.
“Болалар актёрдан катталар актёрига ўтиш ҳар доим қийин бўлади, — дейди актёр Telegraph нашрига берган интервьюсида. — Бунинг устига осиёлик бўлсангиз, бу юз баравар қийинроқ”.
Орзулар қаерга етаклади?
Куан кинода қолди, у режиссёр ёрдамчиси ва каскадёр координатори бўлиб ишлади, лекин ҳар куни у фильмларда рол ўйнашни орзу қиларди.
“Одатда йигирмага кирганингизда, бу ҳаётингизнинг олтин йиллари бўлади. Аммо бу ёшда менинг ишим телефон жиринглашини кутиш эди”, — деб тан олади у журналистларга.
Кейин у кутмай қўйди. Аммо 2018 йилда “Ўта бой осиёликлар” фильмининг чиқиши ва унинг муваффақияти билан ҳаммаси ўзгарди.
“Мен бу фильмни кинотеатрда уч марта томоша қилганимни ва ҳар сафар йиғлаганимни эслайман, — дейди Куан. — Ростанам йиғладим, чунки фильм шубҳасиз ажойиб эди, лекин яна бир сабаб бор эди — мен ўтказиб юборилган имкониятлардан жиддий қўрқардим. Мен у ерда бошқа осиёлик актёрлар билан бирга бўлишни хоҳлардим”.
Шундан кейин Ке Хюи Куан актёрлик касбига қайтишга қарор қилади.
“Актёрликка қайтишга қарор қилганимда 50 ёшда эдим, — дейди у Los Angels Times газетасига. — Менга воз кечишим керак бўлган ва қайтиб келмайди деб ўйлаган орзум ҳақида баланд овозда гапириш учун жасорат керак эди”.
“Такасалтанглар” фильмида Чанк ролини ўйнаган Жефф Коэн ўзини кўнгилочар муҳитдаги ҳуқуқшунос сифатида қайтадан кашф этади. У ихтиёрий равишда Куаннинг вакили бўлади ва бир неча ҳафта ўтгач, актёр “Ҳаммаси ҳар жойда ва бирданига” фильми ижодкорларидан қўнғироқ бўлади. Коэн Куанга шартнома имзолашда ёрдам беради. Фильм продюсери фильми учун Чанк ва Дата билан гаплашишга тўғри келади деб ҳеч ўйламаганини айтиб, ҳазиллашади.
Куан “Ҳаммаси ҳар жойда ва бирданига” фильми сценарийсини олганида фильм унга “Оскар” олиб келишини кутмаган. Қоғозда ва сценарий шаклида фильм унчалик жозибали кўринмасди. Бу муҳожирлар оиласи ҳақидаги драма, ақл бовар қилмайдиган илмий-фантастик фильм ва суперқаҳрамон жанговар саргузаштлари аралашмаси эди.
Куан кир ювиш хизмати менежери (Мишель Ео)нинг эри Ваймонд Вангни, шунингдек, персонажнинг бир нечта муқобил версияларини ўйнади.
Бу фильм унинг актёрлик фаолиятидаги иккинчи ютуғи бўлди ва унга Америка киноакадемияси мукофотини тақдим этди.
Ўз нутқида Куан онасига “у учун қилган қурбонликлари учун” миннатдорлик билдирди. “Менинг онам 84 ёшда ва у тақдирлаш маросимини уйда томоша қилади. Ойи, мен ҳозиргина “Оскар” олдим!”, – деди у саҳнадан ҳис-туйғуларга кўмилиб, олтин ҳайкалчасини ўпган ҳолда.
У акаси ва рафиқасига ҳам миннатдорлик билдирди: “20 йил давомида ойма-ой, йилма йил менинг ҳам даврим келишини айтган рафиқамга раҳмат”.
Ке Хюи Куан “Оскар” билан якунланган ушбу мукофотлаш мавсумида тантанали маросим ва кечаларнинг энг машҳур меҳмонларидан бири эди. Унинг ёқимли табассуми, оптимизми ва яхши табиати ҳеч кимни бефарқ қолдирмади. У чин дилдан ва бироз болаларча завқ билан дунёга машҳур юлдузлардан биргаликда суратга тушишни сўради ва улар бажонидил рози бўлишди.
Стивен Спилберг менга шундай деди: “Қара, энди сен “Оскар” мукофотига сазовор бўлган актёрсан!” Мен бу одамдан бир вақтлар берган имконият учун жуда миннатдорман”, — дейди Куан ҳайкалчани қабул қилиб олгандан кейин ўтказилган матбуот анжуманида.
Энг яхши фильм учун “Оскар” мукофотини Харрисон Форд топширди. У конвертни очди ва натижани эълон қилди: “Ҳаммаси ҳар жойда ва бирданига”. Ке Хюи Куан биринчи бўлиб саҳнага сакраб чиқди ва Индиана Жонс сагасидаги 80 ёшли ҳамкасбини қучоқлаб, бўғиб қўйишига сал қолди.
“Айтишларича, бундай воқеалар фақат фильмларда бўлади, — дейди Куан кўз ёшлариби тия олмай. — Бу мен билан содир бўлаётганига ишонолмайман! Бу Америка орзуси эди! Сиз орзуларингизга ишонишингиз керак. Мен ишонишни деярли тўхтатгандим. Барчангизга айтаман — орзу қилишдан тўхтаманг!”
Изоҳ (0)