“Камерада ўтиришга руҳан тайёрман”: Имрон Хон уни ҳибсга олишларига муносабат билдирди

Покистон собиқ бош вазири Имрон Хон расмийлар уни ҳибсга олишга ҳаракат қилиб, қонундан ташқари ҳаракат қилаётганини айтди. Сиёсатчи BBC’га бу ҳақда маълумот берди.

Полиция 14 март куни собиқ бош вазирни ҳибсга олишга уринганида унинг тарафдорлари билан тўқнашув юз берган. 

“Уларнинг барчаси мамлакат қонунларига бўйсуниши керак”, — дея Имрон Хон уни ҳибсга олмоқчи бўлганлар ҳақида гапирган.

Сиёсатч бош вазир лавозимида бўлган вақтида давлат совғаларини сотишда айбланган. У бу иш сиёсий мотивларга эга бўлганини қайд этган.

14 март куни Хоннинг Лаҳор шаҳридаги уйи яқинида полиция уни ҳибсга олиш учун келганида сиёсатчининг тарафдорлари билан кескинлик авж олган. Офицерлар тош ва ғишт отаётган Хоннинг тарафдорларини тарқатиш учун кўздан ёш оқизувчи газдан фойдаланган.

Хоннинг таъкидлашича, полиция уни 14 март куни ҳибсга олишига “ҳеч қандай сабаб” йўқ, чунки у 18 мартгача ҳимоя гарови олган. У ҳукумат аввалги муваффақиятсиз уринишдан кейин уни қамоққа олишга қатъий қарор қилганини айтган.

“Мен тунни камерада ўтказишга руҳан тайёрман. Қанча кеча ўтишини билмайман, лекин бунга тайёрман”, — деган у.

Имрон Хон унинг партиясининг бўлажак сайловларда иштирок этишини тўхтатиш учун расмийлар уни ҳибсга олишга уринаётгани даъво қилган. 

“Мен қамоқдаманми ёки йўқми, улар менинг партиямнинг ғалабасини тўхтата олмайди”, — дея таъкидлаган Хон.

Ҳукуматга кўра, ҳибсга олиш жараёнининг сайловларга алоқаси йўқ ва полиция уни коррупция иши бўйича ҳибсга олиш тўғрисидаги суд қарорларинигина бажармоқда. Хон ўзининг партия ходимлари, аёллар ва болалардан ҳибсдан қочиш ва тартибсизликларни кучайтириш учун тирик қалқон сифатида фойдаланаётгани айтилмоқда.

Имрон Хон 14 март куни полиция ва тарафдорлари ўртасидаги тўқнашувлардан бир неча соат ўтиб, уйи олдида тарафдорлари билан кўришган. У оломонга мурожаат қилиб, Лаҳор шаҳридаги қароргоҳи ёнида йиғилганлар билан суратга тушган. Сиёсатчини ҳибсга олиш амалиёти ҳозирча тўхтатилган.

Хонни ҳибсга олиш сиёсатчининг уйига яқин жойда крикет турнири ўтказилиши учун тўхтатилгани, сабаби қарама-қаршилик катта тирбандликларга сабаб бўлиши айтилган.