Ўзбекистонда яна бир турдаги ҳуқуқбузарлик ҳақида хабар берган фуқаролар рағбатлантирилиши маълум қилинди

Ўзбекистонда энди яроқлилик муддати ўтган, нотўғри маркировкага эга маҳсулотлар ҳақида хабар берган фуқаролар рағбатлантирилади. Бу ҳақда Тошкент шаҳрида 14 март куни ўтказилган халқаро конференцияда Рақобатни ривожлантириш ва истеъмолчилар ҳуқуқларини ҳимоя қилиш қўмитаси раиси Шоҳрух Шораҳмедов айтиб ўтди, деб хабар бермоқда “Дарё” мухбири.

Шоҳрух Шораҳмедовнинг маълум қилишича, ўтказилган ўрганишлар ва истеъмолчилардан келиб тушаётган мурожаатлар таҳлили соҳада жуда кўп ишларни амалга ошириш кераклигини кўрсатмоқда.

“Жумладан, электрон тижорат соҳасида онлайн харидлардаги маҳсулотларнинг сифати билан боғлиқ масалалар, молиявий хизматлар соҳасида истеъмолчиларга нотўғри маълумот бериш ва етарлича маълумотга эга бўлмаган истеъмолчиларга хизмат кўрсатишда тушунарсиз таклиф ва оферталардан фойдаланиш орқали зарар етказиш, маҳсулотларнинг сифат ва хавфсизлик кўрсаткичлари бўйича талабларга амал қилинмагани каби муаммолар мавжуд”, — дейди Рақобат қўмитаси раиси.

Унинг қўшимча қилишича, савдо марказларидан маҳсулот харид қилган истеъмолчиларга бонус карталари ва бошқа чегирмаларни тақдим этиш пайтида олинган персонал маълумотлардан бошқа мақсадларда фойдаланиш ҳолатлари учрамоқда.

“Истеъмолчига қўнғироқ қилиб, ъсиз акция ёки бошқа совринга эга бўлдингиз, фойдаланиш учун қандайдир маҳсулотни чегирма билан харид қилишингиз мумкинъ каби гаплар билан уларни чалғитиш кундан-кунга авж олиб бормоқда”, — деди Шоҳрух Шораҳмедов.

Таъкидланишича, йил якунигача нотўғри маркировкаланган, яроқлилик муддати ўтган истеъмол товарлари ва дори воситалари нархи бўйича ҳуқуқбузарлик ҳақида хабар берган жамоатчилик назорати субъектларини рағбатлантириш тизимини жорий қилиш режалаштирилган. Тажриба тариқасида товар ва хизматларнинг сифати устидан “маҳалла назорати” механизми жорий этилади.

Шунингдек, 2023 йил давомида қуйидаги ишларни амалга ошириш кўзда тутилган:

• маиший хизмат кўрсатиш қоидаларини ҳамда хусусий тиббий хизмат кўрсатиш қоидаларини ишлаб чиқиш ва жорий этиш;
• истеъмолчилар билан самарали мулоқотни йўлга қўйган субъектларни “Истеъмолчи ишончи” сифат белгиси билан эътироф этиш;
• “қора рўйхат”га киритилган субъектларга нисбатан санкция қўллаш.

Эслатиб ўтамиз, ҳозирда Ўзбекистонда эгаллаб олиниши ҳақида хабар берган, ноқонуний олиб жўнатган фуқаролар рағбатлантирилади. Шунингдек, қоровуллик хизматларига ҳуқуқбузарлик ҳақидаги хабарлар учун пул тўланади.

Мавзуга доир:

• Коррупцияга қарши курашишга муносиб ҳисса қўшган шахсларни мукофотлаш учун ҳар йили давлат бюджетидан қўшимча 500 миллион сўмгача маблағ ажратилади
• Ўзбекистонда Йўл ҳаракати қоидаларининг бузилиши ҳолатлари тўғрисидаги видеоёзув учун 9 минг сўм мукофот пули берилади