Германия Қуролли кучлари раҳбари Украина ҳақидаги гапи сабабли ишдан олинади

Германия мудофаа вазири Борис Писториус Бундесвер бош инспектори Эберхард Зорнни ишдан бўшатмоқчи. Бу ҳақда Spiegel хабар берди.

Маълум қилинишича, 2018 йилдан буён бу лавозимда ишлаб келаётган Зорн ўрнига генерал майор Карстен Бреер тайинланади. AFPънинг аниқлик киритишича, Зорннинг истеъфоси пайшанба куни бўлиб ўтади. У 2022 йилнинг сентябрида Украина Қуролли кучлари Россия қўшинларига самарали қаршилик кўрсата олишига шубҳа билдирганди.

Хусусан, Зорн Focus журналига берган интервьюсида Украина қарши ҳужумлар уюштираётгани, бироқ Россияни орқага қайтара олмаслигини айтган. У Россия армияси Молдовада, Калининград яқинида, Финляндия чегарасида ёки Грузияда иккинчи фронт очиши мумкинлигини таъкидлаган.

Яқинда Бундесвернинг бош инспектори бўлиши кутилаётган 59 ёшли Карстен Бреер 2021 йилнинг ноябридан 2022 йилнинг майигача ҳукуматнинг коронавирус пандемиясига қарши кураш комиссиясини бошқарган.