COVID-19 пандемияси 2023 йилда тугаши кутилмоқда. Бу ҳақда Жаҳон соғлиқни сақлаш ташкилоти (ЖССТ) раҳбари Тедрос Адханом Гебреесус соғлиқни сақлашга қўшган ҳиссаси учун кичик-Томас Френсис медали билан тақдирланган пайтда маълум қилди.
Гебреесуснинг таъкидлашича, вазият яхшиланмоқда ва инфекциядан ҳафталик ўлимлар сони пандемия илк бор тан олган 2020 йил бошига қараганда камроқ.
Шу билан бирга, у пандемия бутун инсоният учун сабоқ бўлиши кераклигини таъкидлади. Гебреесуснинг сўзларига кўра, учта асосий хулосани чиқариш орқали одамлар яқин келажакда юзага келиши мумкин бўлган янги пандемия қийинчиликларига дош бера олади.
Хусусан, у аҳоли саломатлиги муҳимлигини унутмасликка чақирди. У, шунингдек, қатор камбағал давлатлар пандемияга қарши бой мамлакатларга қараганда яхшироқ курашганини, чунки уларда соғлиқни сақлаш тизими яхши йўлга қўйилганини таъкидлади.
“Масалан, касалланганлар билан алоқани кузатиб бориш каби оддий усулни олайлик. Кўпгина бой мамлакатлар буни унутиб қўйишган, дунёнинг камбағалроқ қисмларида эса турли инфекциялар эпидемияси билан курашиш тажрибаси туфайли бундай хотира сақланиб қолган”, — дейди ЖССТ раҳбари.
Шунингдек, у илм-фаннинг муҳимлигини таъкидлади ва замонавий билимлар туфайли инсоният касалликка қарши вакциналарни ишлаб чиқишга муваффақ бўлганини эслатди. Шунингдек, у кўплаб мамлакатлар ниқоб тақиш, карантин ва эмлаш каби элементар масалаларни сиёсийлаштирганини, бу илмий қарашларга зид эканини таъкидлади.
Ниҳоят ЖССТ раҳбари мамлакатларни ҳамкорлиги муҳимлигини айтди ва кўплаб давлатлар вирусга қарши курашишда бошқалар билан кучларни бирлаштиришни истамаётганидан афсус билдирди.
“Изчил ва глобал жавоб ўрнига, пандемия тартибсиз жавоблар аралашмаси билан ўтди”, — деди у.
Изоҳ (0)