Россия фирмалари Марказий Осиёдан келган юзлаб муҳожирларни босиб олинган Украина ҳудудларига ишлаш учун ёллаган. Бу ҳақда Fokus.ua хабар берди.

Муҳожирлар рус аскарларининг жасадларини йиғиш, хандақлар қазиш ва жанговар ҳаракатлар натижасида вайрон бўлган биноларни таъмирлаш билан шуғулланади. Марказий Осиё давлатлари ҳукуматлари ўз фуқароларини Украинага бормаслик ҳақида бир неча бор огоҳлантирган, Украина эса уларни босқинчиларнинг шериклари деб билишини таъкидлаган.

Урмат исмли қирғизистонлик муҳожир Россия компанияси билан шартнома имзолаганини айтди. Ҳужжат шартларига кўра, эркак ҳалок бўлган рус аскарларининг жасадларини йиғиш учун кунига 120 доллар олади. У бундай иш билан боғлиқ хавф-хатарлардан хабардор эканини айтган ва бу мавзуни бошқа қирғизистонлик муҳожирлар билан муҳокама қилганини таъкидлаган.

“Улар менга баъзида ўқ остида қолиш ва одамлар ўлдирилишини айтди. Улар умидсиз бўлгани учун шу ишни қилмоқда, баъзиларининг қарзлари бор”, — деди қирғиз муҳожири.

Меҳнат муҳожирларининг аксарияти ҳарбий ҳаракатлар натижасида вайрон бўлган шаҳарларда, хусусан, Мариуполдаги қурилиш майдонларида ишлайди. Украинага ишлаш учун аёллар ҳам боради. Уларга шарқда босиб олинган ҳудудлардаги ҳарбий госпиталлар, ошхоналар ва фабрикаларда ишлаш таклиф қилинган.

Журналистларнинг аниқлашича, мигрантлар учун асосий рағбат пулдир. Уларга ойига 2000 доллардан 3300 долларгача бўлган маош таклиф этилади, бу Россияда ишчилар олиши мумкин ойликдан бўлганидан анча юқори. Баъзи ишчилар 700 дан 1200 долларгача пул топади.

Тожикистонлик Сорбон исмли шахснинг айтишича, Украинада ишлаш ҳақида сайтлар, Telegram гуруҳлари ва бошқа ижтимоий тармоқларда реклама қилинмоқда. Шунингдек, улар бўш иш ўринлари ҳақида иш берувчилари орқали билиб олади.