Сирдарёда ҳокимлик захирасидаги 6,7 гектар ерни олиб бериш учун пул сўраган шахс ушланди

Андижон ва Сирдарё вилоятларида захирадаги ер майдонларини сотмоқчи бўлган шахслар ушланди, деб хабар беради Бош прокуратура ҳузуридаги департамент.

Қайд этилишича, департамент ҳамда ДХХнинг Андижон вилоят бошқармалари томонидан тезкор тадбир ўтказилган. Тадбирда фуқаро У.Р. Андижон шаҳар “Ўрикзор” МФЙдаги 14 сотих захирадаги ер майдонини фуқаро Ш.Т.га ўзига тегишлилигини айтиб, ер майдонини фирибгарлик йўли билан сотишга келишгани аниқланган. У фуқародан 40 минг АҚШ доллари олётганида ашёвий далиллар билан ушланган.

Шунингдек, Гулистон туманида ўтказилган тадбирда фуқаро Г.А. бошқа бир фуқаро З.Э.га ўзини брокер деб таништириб, унга “юқори лавозимда ишловчи танишлари“ орқали Боёвут туман ҳокимлиги захирасидан 6,7 гектар ер майдонини деҳқон хўжалиги ва чорвачилик учун “E-auksion”дан ютиб беришни ваъда қилгани маълум бўлган. У 4,5 минг АҚШ доллари ва 3 миллион сўмни олаётганда ушланган.

Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.