Сирдарё вилоятида уйга ўғриликка тушган шахс 14 ёшли қизни пичоқлаб ўлдиргани тўғрисида хабар берилганди. Вилоят судининг жиноят ишлари бўйича судлов ҳайъати апелляцияси инстанциясида судланувчининг шикояти кўриб чиқилиб, унга белгиланган жазо ўзгаришсиз қолдирилди.
Сирдарё вилоят судининг жиноят ишлари бўйича судлов ҳайъати апелляцияси инстанциясида Наманган вилояти Тўрақўрғон туманида туғилган, босқинчилик жиноятини содир этгани учун жазосини ўтаётган судланувчининг апелляция шикояти кўриб чиқилди.
Муқаддам 11 маротаба ўғрилик ва бошқа жиноятлар билан судланган 26 ёшли маҳкум манзил-колониядалигида қотиллик содир этган — у Ховос туманидаги уйларнинг бирига ўғирликка тушганида ўзини кўриб қолган 14 ёшли қизни ўлдирган.
Маҳкум 2022 йил 20 август куни соат 04:00 ларда номаълум шахс Ховос тумани Минор кўчасидаги уйларнинг бирига яширинча кириб, уйнинг барча хоналаридан пул ва қимматбаҳо буюмларни излаш жараёнида ётоқхонада ётган 14 ёшли қиз юзини кўриб қолгани сабабли пичоқ билан қасддан ўлдирган.
Сўнг пулларни қидиришни давом эттириб, уйнинг бошқа хонасида намоз ўқиш учун тайёргарлик кўраётган 78 ёшли аёлга пичоқ билан таҳдид қилиб пуллар қаерда эканини талаб қилган. Бироқ аёлдан “пуллар йўқ” деган жавобни олгач, хонанинг том қисмидан бошқа ҳовлига кириб, велосипедни ўғирлаб қочган.
Гумонланувчи ва у билан бирга келган киракаш шериги процессуал тартибда қамоққа олинган. “Замон” информацион дастурида маълум қилинишича, икки жиноятчи ортидан 2022 йил ноябрь ойида манзил-колониянинг тарбиявий ишлар бўлими туркум бошлиғи лавозимида ишлаган 37 ёшли ходим ҳам босқинчини назоратсиз қолдиргани, одам ўлишига сабабчи бўлгани учун қамоққа олинган.
Сирдарё вилояти судининг жиноят ишлари бўйича судлов ҳайъати апелляцияси инстанциясида судланувчининг шикояти қаноатлантирилмади. У Жиноят кодексининг тегишли моддаларида кўрсатилган жиноятларни содир этганликда айбли деб топилиб, 23 йил муддатга озодликдан маҳрум этилди. Шунингдек, Жиноят кодексининг 34-моддасига (Рецидив жиноят) асосан судланувчи “ўта хавфли рецидивист” деб топилиб, махсус тартибли колонияларда жазони ўташи белгиланган. Шериги эса 13 йилга озодликдан маҳрум этилди.
Изоҳ (0)