Украина ва АҚШ ўртасида ўзаро тушуниш ҳақидаги оммавий баёнотларга қарамай урушни тугатиш бўйича парда ортидаги келишмовчиликлар кучаймоқда. Бу ҳақда Politico хабар берди.
Айрим америкалик сиёсатчилар Вашингтон Киевга жуда кам қурол бераётгани ва у фақат мудофаага мўлжалланганини айтмоқда.
“Бу шунчаки уларга ғалаба қозониши учун эмас, балки омон қолиши учун етарли даражада ёрдам беришми? Мен ҳозирда ғалаба қозониш сиёсатини кўрмаяпман, агар у йўқ бўлса, биз нима қиляпмиз?” — дея Вакиллар палатаси аъзоси Майкл Маккол сиёсатини танқид қилган.
Байден маъмурияти эса Украина қўмондонлиги Бахмутни таҳдидга қарамай, ўжарлик билан ҳимоя қилишга қарор қилганидан “ғазабда”.
“Маъмуриятнинг кўплаб амалдорлари Украина Бахмутга шунчалик кўп ишчи кучи ва ўқ-дорилар сарфлаётгани, бу уларни баҳорда йирик қарши ҳужум бошлаш имкониятидан маҳрум қилиши мумкинлигидан хавотирлана бошлади”, — дейилади хабарда.
Вашингтонни асабийлаштирган яна бир омил, яқинда ОАВда “Шимолий оқим” газ қувуридаги портлашга “украинапараст гуруҳ” масъул экани ҳақидаги хабарлар сабаб бўлган. Бундан ташқари Киевнинг янги қурол-яроғлар жўнатиш бўйича доимий сўровидан Оқ уй ғазабда экани айтилган. Жумладан, "Зеленский муносиб миннатдорлик билдирмагани" қайд этилган.
АҚШ расмийларининг таъкидлашича, АҚШ Киевга Украинани Россияга қарши урушда чексиз молиялаштира олмаслигини очиқ-ойдин билдирган. Бироқ баъзи бир келишмовчиликлар ва умумий фикр бирлигининг йўқлиги ҳамкор давлатлар ўртасидаги нормал муносабатлар экани таъкидланади.
“Зеленский аввал ҳам (Россия кенг кўламли бостириб киришидан олдин) АҚШ ҳақида кескин баёнотлар билдирган, Оқ уй эса очиқ ва ёпиқ тарзда келишмовчиликни муҳокама қилган. Аммо бу АҚШнинг Украинани қўллаб-қувватлашига, томонлар ҳамкорлигига путур етказмаган”, — деди Атлантика кенгашининг Евросиё маркази директори ўринбосари Шелби Магид.
Шунга қарамай, АҚШ ва Украина ўртасидаги муносабатлардаги асосий ”инқироз нуқтаси” уруш қандай якунланиши кераклиги ҳақидаги қарашдир. Вашингтон Россия Қримни йўқотиш билан келишиб олишига шубҳа қилмоқда. Америкаликлар Украина принципиал жиҳатдан Қрим ва Донбассни озод қилишга қодирлигига ҳам шубҳа билдирган.
“Ҳозирча Байден АҚШ уруш ва тинчлик бўйича барча қарорларни Зеленский ихтиёрига топширади, деган сўзида туришда давом этмоқда. Аммо Вашингтонда уруш давом этар экан ва янги президентлик сайловлари яқинлашар экан, бу қарор қанчалик ишончли бўлиши ҳақида миш-мишлар тарқалди”, — дея хулоса қилади Politico.
Изоҳ (0)