Андижон вилоятида хонадонида ноқонуний майнинг ферма ташкил этган шахс жавобгарликка тортилди. Бу ҳақда ИИВ Киберхавфсизлик маркази хабар берди.
Маълум қилинишича, Андижон вилояти ИИБ Киберхавфсизлик бўлими ва ДХХ Андижон вилояти бошқармаси ходимлари ҳамкорлигида электрон технологиялар билан боғлиқ ноқонуний ҳолатларни аниқлаш юзасидан тезкор-профилактик тадбир ўтказилган. Тадбир давомида Андижон шаҳрида истиқомат қилувчи 29 ёшли Қ.Б. ноқонуний равишда хонадонида 21 та фаол майнинг қурилмаларидан фойдаланиб, майнинг ферма ташкил қилгани аниқланган.
У майнинг ферма фаолияти учун ҳеч қандай рухсатнома ва ҳужжатларсиз электр энергиясидан фойдаланиб келган ҳамда электр тармоғига ўзбошимчалик билан ҳисоблагичларсиз уланиб олган.
Фуқаро Қ.Б.га нисбатан Маъмурий жавобгарлик тўғрисидаги кодекснинг 101-моддаси (Электр, иссиқлик энергияси, газдан фойдаланиш қоидаларини бузиш) билан 900 миллион сўм миқдорида жарима жазоси тайинланган.
Изоҳ (0)