Россия томонидан Украинага юборилган ўзбекистонлик эркак ҳалок бўлди, унинг жасади мамлакатга олиб келинган.
Қайд этилишича, 30 январь куни Россия томонидан Украинада бўлаётган қуролли тўқнашувга юборилган ва у ерда ҳалок бўлган элликқалъалик 43 ёшли Ф.Х. жасади Ўзбекистонга олиб келинган.
Маълум қилинишича, фуқаро Ф.Х. ёшлигидан ота-онаси ажрашгани сабаб турли жойларда ишлаб, меҳнат қилиб келган. Марҳумнинг онасининг сўзларига кўра, ўғил Ўзбекистонда пайвандчилик билан шуғулланган, яхши пул топган. Аммо дўстларининг таклифи билан кўпроқ пул топиш мақсадида Россияга кетган ва бир неча йил давомида у ерга бориб-келиб юрган.
2019 йил ноябрь ойида ишлаш учун яна Россияга кетган Ф.Х. ўша йилнинг декабрь ойида жанжал сабаб қамоққа олинган ва 5 йилга озодликдан маҳрум этилган. Фуқаро Ф.Х. Россияда яшайдиган синглисига ўзини қамоқдан Украинадаги урушга юборишмоқчилигини айтган ва 2022 йил декабридан бошлаб у алоқага чиқмай қўйган.
Марҳумнинг онасининг айтишича, 2023 йил январь охирида ўғлининг вафот этгани ва майитни қаерга юборишлари бўйича хабар келган.
Ф.Х. билан таниш бўлган инсонларнинг айтишича, у ишлаган жойга снаряд келиб тушган. Марҳумнинг укаси жасадга жиддий шикаст етганидан уни таниб бўлмаганини билдирган. У акасини бўйнидаги чандиқ орқали ажратиб олган.
Аввалроқ АҚШ “Вагнер” гуруҳи Украинадаги урушга 40 000 маҳбус юборганини маълум қилганди. “Вагнер”чиларнинг 90 фоизи маҳбуслардан иборат экани қайд этилган. Январь ойида Луганск вилоятида “Вагнер” хусусий ҳарбий компанияси ўқув марказидан олти маҳбус қочиб кетган, улар орасида Ўзбекистон, Беларусь ва Қирғизистон фуқаролари ҳам бўлган. Ёлланма жангчилар жанговар ҳаракатлар зонасига кетиши керак бўлган пайтда қочиб кетган.
Бундан ташқари “Вагнер” чеченистонлик маҳбусларни ҳам Украинага қарши урушга жалб қилишни бошлаган. Россияда аёл маҳбуслар ҳам урушга ёлланган. Украина Қуролли кучлари Россия урушдаги йўқотишларини Ўзбекистон ва Тожикистондан келган меҳнат муҳожирлари ҳисобига тўлдираётганини қайд этган.
Изоҳ (0)