Ўзбекистонда дам олиш кунлари ҳаво салқинлаб, ёмғир ёғиши кутилмоқда

Ўзгидромет 11—12 март кунлари учун об-ҳаво прогнозини эълон қилди.

Унга кўра, шанба ва якшанба кунлари Ўзбекистон ҳудудига Каспий денгизи ҳудудларидан нам ва салқин ҳаво массаси кириб келиши кутилмоқда.

11 март куни Бухоро, Навоий, Қашқадарё вилоятларида ва кечга томон Тошкент, Самарқанд, Жиззах, Сирдарё, Сурхондарё вилоятларида баъзи жойларда ёмғир ёғади, момақалдироқ бўлиши мумкин. Республиканинг қолган ҳудудларида ёғингарчилик кутилмайди.

12 март куни республика бўйича баъзи жойларда ёмғир ёғиши кутилмоқда, айрим жойларда кучли бўлади, момақалдироқ бўлиши мумкин. Шимолий ҳудудларда ёғингарчилик кутилмайди.

Шанба куни республика бўйича баъзи жойларда шамол тезлиги 15-20 метр/секундгача кучаяди, айрим жойларда чанг-тўзон билан кузатилади. Ҳарорат кечаси 10-15 даража илиқ атрофида, эртага кундузи 21-26 даража илиқ бўлади, якшанба куни ҳаво салқинроқ бўлади, ҳарорат 13-18 даража илиқдан юқори бўлмайди.

10 мартда республиканинг тоғли ҳудудларида қор кўчиши хавфи бор. 10—12 мартда кутилаётган ёмғирлар ҳисобига тоғолди ва тоғли ҳудудларда сел-сув тошқин ҳодисалари юзага келиши мумкин.

Тошкентда шанба куни кечга томон ва якшанба куни кун давомида ёмғир ёғиши кутилмоқда, момақалдироқ бўлиши мумкин. Шарқий шамол йўналишини ўзгартириб, ғарбдан 7-12 метр/секунд тезликда эсади.

11 март куни кундузги ҳаво ҳарорати 24-26 даража илиқни ташкил этади, якшанба куни 17-19 даража илиққача салқинлашади.