Олий Мажлис Қонунчилик палатаси 10 март куни бўлиб ўтган мажлисда янги таҳрирдаги “Конституция тўғрисида”ги қонун лойиҳаси бўйича референдум ўтказиш тўғрисида қарор қабул қилди.
Референдумни 2023 йилнинг 30 апрель, якшанба куни ўтказилиш белгиланди. Қарор Сенатга юборилади, у ҳужжатни 14 март куни кўриб чиқиши кутилмоқда.
Бугун, 10 март куни Олий Мажлис Қонунчилик палатасининг “Ўзбекистон Республикаси Конституцияси тўғрисида”ги Конституциявий қонун лойиҳаси муҳокама қилинди. Муҳокамалар давомида қатор таклифлар кўриб чиқилди. Хусусан, Конституция лойиҳасининг 18-моддаси 1-қисми бўйича депутат Нодира Жонибекованинг таклифи муҳокама қилиниб, ушбу қисм янги таҳрирда эълон қилинди: “Ўзбекистон Республикаси давлатлар ва халқаро ташкилотлар билан икки ва кўп томонлама муносабатларни ҳар томонлама ривожлантиришга қаратилган тинчликсевар ташқи сиёсатни амалга оширади”.
Шунингдек, депутат Шерзод Тўхташевнинг Конституциянинг 27-моддасига ўзгартириш киритиш бўйича таклифи қабул қилинди.
Конституция лойиҳасининг 26-моддаси 3-қисмига қуйидаги жумла қўшилди: “Ҳеч нарса инсон шаъни ва қадр-қимматини камситиш учун асос бўлиши мумкин эмас”.
Изоҳ (0)