ДХХ Чегара қўшинлари ва Наманган вилояти бўйича бошқармаси ҳарбий хизматчилари томонидан олиб борилган тезкор-қидирув тадбирларида катта миқдордаги наркотик моддаларнинг ўзбек-қирғиз давлат чегарасидан ноқонуний ўтказилган ҳолати аниқланди, деб хабар беради ЎзА.
Қайд этилишича, давлат чегарасининг Янгиқўрғон тумани ҳудудидан ўтувчи қисмида номаълум шахслар томонидан қолдириб кетилган 14 килограмм 512 грамм гашиш моддаси борлиги аниқланиб, процессуал тартибда расмийлаштириб олинган.
Ҳозирда ҳолат юзасидан ДХХ Наманган вилояти бўйича бошқармаси томонидан Жиноят кодексининг 246-моддаси (Контрабанда) билан жиноят иши қўзғатилиб, ушбу гиёҳвандлик воситалари эгаларининг шахсига аниқлик киритиш бўйича зарур чора-тадбирлар амалга оширилмоқда.
ДХХ Тошкент шаҳар бўйича бошқармаси ходимлари томонидан бошқа ҳуқуқ-тартибот идоралари билан ҳамкорликда ўтказилган тезкор тадбирда эса Наманган—Тошкент йўналишида ҳаракатланаётган Lacetti русумли автомашина Оҳангарон тумани ҳудудида тўхтатилган.
Автомашина кўздан кечирилганда, унда йўловчи сифатида кетаётган, Фарғона вилоятида туғилган 21 ёшли фуқарога тегишли қўл сумкаси ичида 50 грамм героин моддаси, 672 дона “Регапен” ва 300 дона “Тропикамид” кучли таъсир қилувчи дори воситалари борлиги аниқланиб, процессуал тартибда расмийлаштириб олинди.
Тезкор тадбир давом эттирилиб, Қирғизистон фуқароси томонидан Янгиқўрғон тумани ҳудудига контрабанда йўли билан ўтказилган ушбу гиёҳвандлик воситаларини 1,8 минг долларга сотиб олган Бухоро вилоятида туғилган 27 ёшли шахс ҳам Оҳангарон туманидаги “Чинор” ЙПХ масканида ушланган.
Таъкидланишича, мазкур шахсларнинг бири Тошкент шаҳридаги давлат, иккинчиси эса нодавлат университетларнинг талабалари ҳисобланиб, улар пойтахт ҳудудида наркотик моддалар савдоси билан шуғулланишган.
Ҳозирда ушбу фуқароларга нисбатан ДХХ Тошкент шаҳар бўйича бошқармаси томонидан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
Изоҳ (0)