Ижтимоий тармоқларда Республика маънавият ва маърифат маркази бюджет ҳисобидан харид амалга оширишда манфаатлар тўқнашувига йўл қўйгани ҳақида хабарлар тарқалди. “Дарё” мухбири марказ матбуот хизмати раҳбари Эгамберди Хўжамуродов билан боғланиб, ҳолат юзасидан изоҳ олди.
Давлат харидлари портали мониторинг қилинганда, ҳақиқатдан ҳам Маънавият ва маърифат маркази 2022 йилнинг 15 декабрь кунида иккита тўғридан тўғри харид амалга оширгани аниқланди:
- “Уйғониш маърифати” китобини босиб чиқариш учун;
- “Янги Мўйноқ” китоб-альбомини босиб чиқариш учун.
Биринчи ҳолатда (лот рақами: 1139097) марказ ва “Маънавият” нашриёти ўртасида 92 миллион 903 минг 900 сўмлик шартнома тузилган.
Бунда бажарувчи нашриёт Маънавият ва маърифат маркази директори Минхожиддин Мирзо муаллифи бўлган “Уйғониш маърифати” китобини 2 минг ададда босмадан чиқариб бериш масъулиятини олган. Китобнинг бир донаси 40 минг сўмдан ошиққа баҳоланган.
Иккинчи ҳолатда ҳам (лот рақами: 1155399) марказ ва яна юқоридаги “Маънавият” нашриёти ўртасида харид келишуви амалга оширилган. Унга кўра, лотнинг бошланғич қиймати — 1 миллиард 319 миллион 721 минг 600 сўм.
Шартнома баённомасига кўра, нашриёт “Янги Мўйноқ” китоб-альбомини 3 минг ададда босиб чиқариши кўзда тутилган. Ҳар бирининг нархи 382 минг 528 сўмга тўғри келади.
.jpg)
Эътиборлиси, очиқ манбалардаги маълумотлар марказ билан иккита катта харид келишувига эришган “Маънавият” нашриётининг 100 фоиз улуши айнан Республика маънавият ва маърифат марказига тегишли эканини кўрсатмоқда.
“Дарё” мухбири марказ матбуот хизмати раҳбаридан нега харид тўғридан тўғри амалга оширилгани, тендер орқали очиқ савдога чиқарилмаганини сўради. У эса “ҳаммаси қонуний тарзда амалга оширилган”ини билдирди.
“Шу бўйича шуғулланяпмиз ҳозир. Бу ерда ноқонуний нарса йўқ. Бу пул сарфланишидан олдин давлат назоратидан ўтади.Тендерсиз ўтказилмайди, мумкин эмас”, — деди Эгамберди Хўжамуродов.
Изоҳ (0)