2023 йил 1 март ҳолатига кўра, Ўзбекистоннинг олтин-валюта захиралари 34 млрд долларни ташкил қилди.
Захиралар ўтган ойга нисбатан қарийб 2 млрд долларга камайди. Улар асосан олтин ва хорижий валютадан иборат. Февраль ойида иккиси ҳам камайган:
- валюта — 1,2 млрд долларга камайди (умумий 10,1 млрд доллар);
- олтин — 716,6 млн долларга кўпайди (умумий 23,56 млрд доллар).
Февралга қадар Ўзбекистоннинг олтин-валюта захиралари кетма-кет учинчи ой кўпайиб келаётган эди. Бу шу даврда олтин нархлари кўтарила бошлагани билан боғлиқ.
Мамлакат захираларида тахминан 392 тонна олтин бор ва январга нисбатан 7 тоннага кўпайган. Бироқ февраль охирида олтин нархлари тушгани сабаб олтин захиралари қиймати камайган.
1 февраль куни бир грамм олтин нархи 2022 йилнинг май ойидан бери биринчи марта қарийб 63 долларга етди. Ой охирида нархлар 58 долларгача пасайди.
Сўнгги ойларда Ўзбекистон юқори нархлар сабаб фаол равишда олтин экспорт қилаётган эди. Январда мамлакат дунё бўйича олтиннинг асосий сотувчисига айланган. Февралда нархлар пасая бошлагани сабаб Ўзбекистон катта эҳтимол билан олтин сотишни тўхтатган.
Мамлакат олтин сиёсати айнан нархлар билан боғлиқ. 2022 йилда олтин бир неча йиллик энг арзон даражада бўлганда Ўзбекистон Марказий банки етти ой олтин сотмаган ва бу даврда олтинни асосий сотиб олувчилардан бири бўлган эди.
Олтин захиралари нима учун керак?
Оддий тил билан айтганда, бу суғурта, давлатнинг “хавфсизлик ёстиғи”. Захиралар дунёнинг деярли барча мамлакатларида фавқулодда вазиятлар учун мавжуд.
Захиралар одатда юқори ликвидли, яъни тез сотиладиган активларда сақланади. Олтин ва хорижий валюта ушбу талабларга жавоб беради — улардан исталган вақтда қарз тўлаш ёки инвестициялар учун фойдаланиш мумкин.
2017 йилгача Ўзбекистон захиралари тўғрисидаги маълумотлар жамоатчиликка эълон қилинмас эди. Ўша йилнинг ноябрь ойида захиралар 26 миллиардни ташкил этиши маълум бўлган. Ўшандан бери улар 10 млрд долларгача ўсган.
Захиралардан қандай мақсадларда фойдаланиш мумкин ва ўрни қандай тўлдирилади?
Захиралардан турли мамлакатларда турлича фойдаланилади. Бу одатда тўлов баланси тақчиллигини молиялаштириш, валюта бозорида интервенсиялар ўтказиш, миллий валюта курсини ушлаб туриш, ташқи қарзларни қоплаш ва бошқаларни ўз ичига олади.
Захиралар мамлакатда қазиб олинган олтин, халқаро бозорга қимматли қоғозлар чиқарилиши, савдо баланси профицити ва бошқалар ҳисобига тўлдирилади.
Масалан, Ўзбекистонда захиралар ОКМК ёки НКМК томонидан қазиб олинган олтин ҳисобига тўлдирилади. Олтин четга сотилганда мамлакатдаги захиралар ҳам камаяди.
Изоҳ (0)