Ўзбекистон Туркманистон билан тўлақонли эркин савдо режими тарафдори, деб хабар беради “Orient” (Туркманистон).
Бу ҳақда Ашхободда бўлиб ўтган Туркманистон—Ўзбекистон ҳукуматлараро ҳамкорлик комиссиясининг йиғилишида сўзга чиққан Ўзбекистон бош вазири ўринбосари Жамшид Хўжаевнинг сўзларига таяниб ўтилган.
“Тўлиқ ҳуқуқли эркин савдо режимини жорий этиш, Шовот—Тошҳовуз чегара савдо зонаси фаолиятини йўлга қўйиш ва келажакда иккинчи шундай ҳудудни яратиш бўйича ҳаракатларни мувофиқлаштириш муҳим”, — дейди Хўжаев.
2022 йилда икки давлат ўртасидаги умумий товар айирбошлаш ҳажми миллиард долларга яқинлашди.
“Бу яхши натижа, аммо бизнинг барча имкониятларимизни акс эттирмайди”, — дея қўшимча қилди у.
Ўзбекистоннинг Хоразм вилояти ва Туркманистоннинг Тошҳовуз вилояти чегарасида чегара эркин савдо зонаси қурилиши Ўзбекистон президенти Шавкат Мирзиёевнинг 2022 йил октябрь ойида Туркманистонга ташрифи чоғида бошланган эди.
Лойиҳа доирасида замонавий инфратузилма, жумладан, савдо павильонлари, омборхоналар, контейнер майдончалари ва тадбиркорлар учун иш ўринлари яратиш режалаштирилган.
Изоҳ (0)