Россиянинг “Бюллетен кинопрокатчика” журнали бош муҳаррири Александр Нечаев 37 ёшида Тошкентда вафот этгани тўғрисида хабар берилганди. Бош прокуратура матбуот хизматининг маълум қилишича, ҳолат юзасидан текшириш ўтказилмоқда.
Суд-тиббиёт экспертизасининг дастлабки хулосасига кўра, Нечаевнинг ўлими “сурункали юрак-ўпка етишмовчилиги, юракнинг сурункали ишемик касаллиги”дан келиб чиққан.
“Александр Нечаевнинг танаси кўздан кечирилганда тан жароҳатлари аниқланмаган. Текшириш давом этмоқда”, — дейилади идора хабарида.
Марҳум журналистнинг дўсти Денис Корсаков аввалроқ Нечаев бир неча ой яшаш учун Тошкентга кетгани ва апрель ойида Москвага қайтишни режалаштирганини айтганди. 6 март куни Нечаев алоқага чиқишнинг иложи бўлмаган, унинг дўстлари тошкентлик танишларидан ҳаммаси жойида ёки йўқлигини текширишни сўраган. Улар уй эгаси ва ички ишлар ходимлари билан биргаликда ижарага олинган хонадонга келган. Шу пайтда Александр Нечаев ўлик ҳолда топилган.
Изоҳ (0)