Сирдарё туманидаги “Қолгансир“ давлат ўрмон ов хўжалиги ер майдонида ёнғин содир бўлди. Бу ҳақда Табиат ресурслари вазирлиги ахборот хизмати хабар берди.
Маълум бўлишича, хўжаликнинг 10 гектар майдонида ёнғин содир бўлган, шундан 2 гектар ер майдонидаги мавжуд манзарали дарахтлар тегишли тартибда хатловдан ўтказилиб, жами 4 турдаги 294 дона манзарали дарахтлар ўсишдан тўхташ, 4 турдаги 217 дона манзарали дарахтлар эса ўсишдан тўхтамайдиган даражада шикастлангани аниқланган. Ўсимлик дунёсига етказилган зарар ҳисобланганда 494 миллион 940 минг сўмни ташкил этган.
Ёнғиннинг келиб чиқишига ''Шоликор“ ва ''Синдоробод" СИУ ҳудудида фаолият олиб борувчи 35 нафар фермер ва деҳқон хўжаликлари томонидан шолидан бўшаган ер майдонидаги ўсимлик қолдиқларининг ёқиб юборилганлиги сабаб бўлган ва бунинг натижасида жами 311,7 гектар дала ер майдони ёнган.
Ёнғин оқибатида ернинг унумдор қатламидаги балл бонитети пасайишига сабаб бўлган ҳолатлар бўйича дастлабки ҳисоб-китоблар қилиниб, 295 миллион 627 минг сўм зарар миқдори белгиланган. Юқоридаги ҳолатлар бўйича тегишли тартибда ҳужжатлар расмийлаштирилиб, ҳуқуқни муҳофаза қилувчи органларга тақдим этилмоқда. Ҳолат юзасидан қўшимча ахборот берилиши таъкидланган.
Изоҳ (0)