2023 йилда Ўзбекистонда Мўғулистон элчихонаси очилиши режалаштирилмоқда. Бу ҳақда 8 март куни Тошкент шаҳрида Ўзбекистон ташқи ишлар вазири Бахтиёр Саидов ва Мўғулистон ташқи ишлар вазири Батмунх Батцецег иштирокида ўтказилган учрашувда маълум қилинди. Ҳозирда мамлакатда Мўғулистоннинг фахрий консуллиги мавжуд.
“Ўзбекистонда Мўғулистон элчихонасини очиш қарорини олқишлаймиз. Сўнгги йилларда икки томонлама алоқалар барча соҳаларда истисносиз ижобий суръат кўрсатмоқда”, — деб ёзади Бахтиёр Саидов ўзининг Telegram каналида.
Ташқи ишлар вазирлигининг хабар беришича, учрашувда ўзаро ҳамкорликнинг шартномавий-ҳуқуқий асосларини кенгайтириш, ТИВлараро маслаҳатлашувларнинг навбатдаги даврасини ўтказиш, савдо айланмасини диверсификация қилиш ва қўшма ҳамкорлик лойиҳаларини амалга ошириш бўйича таклифлар муҳокама қилинган.
Қишлоқ хўжалиги соҳасида ҳамкорлик бўйича Ўзбекистон—Мўғулистон ишчи гуруҳи ва Ишбилармонлар кенгашини ташкил этиш масалаларини ўрганиш бўйича келишувга эришилган.
7 мартдан 10 мартга қадар давом этадиган ташриф доирасида Батмунх Батцецег ва Мўғулистоннинг бошқа расмий вакиллари Ўзбекистон қишлоқ хўжалиги, сармоя, саноат ва савдо, транспорт вазирликлари ҳамда Вазирлар Маҳкамасида ҳам учрашувлар ўтказмоқда.
Таъкидланишича, бу 1992 йилда икки давлат ўртасида дипломатик муносабатлар ўрнатилганидан бери Мўғулистон ташқи ишлар вазирининг Ўзбекистонга илк ташрифидир. Мўғулистон президенти эса Шанхай ҳамкорлик ташкилоти саммитида иштирок этиш учун кузда Ўзбекистонга ташриф буюрганди.