Ўзбекистон ва Қирғизистон ўзаро товар айирбошлаш ҳажмини 2 миллиард долларга етказишни режалаштирмоқда, деб хабар беради “Дунё” агентлиги.
Қайд этилишича, икки мамлакат ўртасида дипломатик муносабатлар ўрнатилганининг 30 йиллигини нишонлаш муносабати билан Ўзбекистон элчиси Хуршид Мирзоҳидов Қирғизистон Миллий телерадиокомпаниясининг “Биринчи радио” радиоканалини “Вектор” дастурига интервью берган. Унда элчи ҳамкорликнинг устувор йўналишларини санаб ўтган. Булар:
- етакчи корхона ва бизнеслар ўртасидаги ҳамкорлик;
- транзит салоҳиятидан самарали фойдаланиш ва уни ошириш;
- сувдан ва энергетика соҳасидан фойдаланишда ҳамкорлик;
- минтақалараро ҳамкорлик;
- икки мамлакат халқларини бир-бирига яқинлаштириш мақсадида маданий-гуманитар алмашинувларни фаоллаштириш.
Мирзоҳидовнинг сўзларига кўра, иқтисодий ҳамкорлик икки мамлакат ўртасидаги сиёсий, маданий-гуманитар йўналиш билан бир қаторда Ўзбекистон—Қирғизистон муносабатларининг муҳим бўғини ҳисобланади. Таъкидланишича, мамлакатлар ўртасидаги савдо-иқтисодий алоқалар изчил ривожланмоқда, товар айирбошлаш даражаси ўсиш тенденциясига эга.
Изоҳ (0)