Қозоғистоннинг собиқ мудофаа вазири Мурат Бектанов 12 йиллик қамоқ жазосига ҳукм қилинди. Бу ҳақда Ихтисослаштирилган туманлараро ҳарбий судга таяниб, Kazinform хабар берди.
Маълум қилинишича, Мурат Бектанов иши бўйича суд ҳукми 2023 йил 24 февралда эълон қилинган.
“М.Бектанов Жиноят ишлари бўйича ихтисослаштирилган туманлараро ҳарбий судининг 2023 йил 24 февралдаги ҳукми билан Қозоғистон республикаси Жиноят кодексининг 451-моддаси 3-қисми бўйича судланган. Унга нисбатан 12 йил муддатга озодликдан маҳрум қилиш жазоси тайинланди”, — дейилади суд хабарида.
Ушбу моддага кўра, у муайян лавозимларни эгаллаш ёки муайян фаолият билан шуғулланиш ҳуқуқидан умрбод маҳрум этилади. Қозоғистон собиқ мудофаа вазири жазо муддатини жазони ижро этиш тизимидаги максимал хавфсизлик муассасасида ўтайди. Суд ишнинг “сирли” гриф остида кўриб чиқилганига ишора қилиб, батафсилроқ маълумот бермаган.
Эслатиб ўтамиз, Қозоғистон собиқ мудофаа вазири этиб 2022 йилда қайта сайланган Мурат Бектанов январь воқеаларидан сўнг ўз лавозимидан четлаштирилганди. 20 февраль куни у Қозоғистон республикаси Жиноят кодексининг 452-моддаси билан (хизмат фаолиятида ҳаракатсизлик факти бўйича) қўлга олинган. Кейинроқ Бош прокуратура Бектанов иши Қозоғистон Жиноят кодексининг 451-моддаси 3-қисми (хизмат ваколатларини суиистеъмол қилиш) билан квалификация қилинганини маълум қилган.
2023 йилнинг январь ойида Бош прокурор Берик Асилов Бектанов “очиқ-ойдин ноқонуний буйруқлар бергани ва ҳарбий стратегик объектларни ҳимоясиз қолдиргани” ва “мансаб ваколатини суиистеъмол қилганликда айбланаётгани”ни айтган.
Изоҳ (0)