Журналист ва шоир, “Инсон ва қонун” газетаси ҳамда “Ҳуқуқ ва бурч” журнали бирлашган таҳририяти ходими Акмал Тошев вафот этди. Бу ҳақда “Дарё”га унинг ҳамкасби Аслиддин Алимардонов хабар берди.
“Кеча янги сотиб олган уйининг таъмири учун усталарга қурилиш материаллари олиб бериб, қайтаётганда кўчада юраги безовта қилган дейишди. Тез ёрдам етиб келгунга қадар жони узилган экан”, — дейди бу ҳақда хабар берган журналист Аслиддин Алимардонов.
Акмал Тошев 1985 йил 6 апрелда Қашқадарё вилоятининг Деҳқонобод туманидаги Оқтош қишлоғида туғилган. 1992—2003 йилларда қишлоқдаги 41-умумтаълим мактабида таҳсил олган. Сўнгра Мирзо Улуғбек номидаги Ўзбекистон Миллий университети журналистика факультетининг бакалавр, магистратура босқичларини тамомлаган.
Унинг “Моҳият лаҳзалари” (2008), “Фариштали кунлар” (2011) номли шеърий тўпламлари нашр этилган. “Қашқадарё баёзи” (2007), “Ёшлар китоби” (2008), ҳамда “Олтин кўприк” (2010) алманахларига шеърлари киритилган.
Изоҳ (0)